(កំពង់ឆ្នាំង) ៖ ស្ត្រីម្នាក់បានស្លាប់ភ្លាមៗនៅកន្លែងកើតហេតុ ដោយសាររថយន្ត ១គ្រឿង បើកវ៉ាជែង ម៉ូតូ បណ្តាលឲ្យម៉ូតូដួលខ្ទាតជនរងគ្រោះចូលក្រោមរថយន្ត កិនស្លាប់តែម្តង ។
ហេតុការណ៍នេះ កើតឡើងនៅថ្ងៃទី២១ ខែធ្នូ ឆ្នាំ២០២០ វេលាម៉ោង១២និង៤៥នាទី នៅចំណុចផ្លូវជាតិលេខ៥ ចន្លោះគីឡូម៉ែតលេខ៤៥-៤៦ ស្ថិតនៅភូមិចំការស្វាយ ឃុំសេដ្ឋី ស្រុកសាមគ្គីមានជ័យ ខេត្តកំពង់ឆ្នាំង ។
សេចក្តីរាយការណ៍បានឲ្យដឹងថា រថយន្តបង្កម៉ាកហ៊ីយ៉ាន់ដាយ ពណ៌ស ពាក់ស្លាកលេខ កំពង់ចាម 3A-9133 អ្នកបើកបរឈ្មោះ ម៉ៅ សុខមី ភេទប្រុស អាយុ ៣៤ឆ្នាំ នៅភូមិអូតាប៉ោង ឃុំអូរតាប៉ោង ស្រុកបាកាន ខេត្តពោធិ៍សាត់ បើកបរក្នុងទិសដៅពីត្បួងទៅជើងមកដល់ចំណុចខាងលើ បានឡើងវ៉ាជែងម៉ូតូ ១គ្រឿង បណ្ដាលអោយម៉ូតូដួលខ្ទាតអ្នកជិះពីក្រោយ ចូលក្រោមកង់រថយន្តខាងក្រោយផ្នែកខាងស្ដាំ បណ្ដាលអោយស្លាប់ភ្លាមៗនៅកន្លែងកើតហេតុ ។
ជនរងគ្រោះដែលស្លាប់បាត់បង់ជីវិតឈ្មោះនាង គន្ធា ភេទស្រី អាយុ ២៨ឆ្នាំ នៅភូមិតាង៉ូវ សង្កាត់ច្បារអំពៅ ខណ្ឌច្បារអំពៅ ក្រុងភ្នំពេញ និងអ្នកបើកបររងរបួសជើងខាងឆ្វង ។
បច្ចុប្បន្ន សមត្ថកិច្ចបានធ្វើការឃាត់ខ្លួនអ្នកបើកបររថយន្តដើម្បីចាត់ការបន្តតាមផ្លូវច្បាប់ ៕ ដោយ៖ AUN REAKSA
