(ភ្នំពេញ) ៖ ក្រសួងសុខាភិបាលបានព្រមានថា ការបាញ់សារធាតុ ឬទឹកសម្លាប់មេរោគ ឫអាល់កុល លើសរីរាង្គមនុស្ស មិនអាចជួយប្រឆាំងនឹងវីរុសកូវីដ-១៩ នោះឡើយ តែផ្ទុយទៅវិញគឺវានិងអាចបណ្តាលឲ្យមានគ្រោះថ្នាក់ដល់សុខភាពមនុស្សបាន ។
លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការនិងជាអ្នកនាំពាក្យក្រសួងសុខាភិបាល បានឲ្យដឹងនៅថ្ងៃទី២២ ខែធ្នូ នេះថា «ការបាញ់ទឹកសម្លាប់មេរោគ ឬសារធាតុសម្លាប់មេរោគ ឬអាល់កុល លើសរីរាង្គមនុស្សនឹងមិនអាចជួយការពារលោកអ្នកប្រឆាំង នឹងវីរុសកូវីដ-១៩ បានទេ និងអាចមានគ្រោះថ្នាក់» ។
លើសពីនេះ WHO ក៏បានបញ្ជាក់ដែរថា «មិនត្រូវបាញ់ថ្នាំសម្លាប់មេរោគ ឬអាល់កុល ឬសារធាតុសម្លាប់មេរោគ ទៅលើខ្លួនមនុស្សនៅគ្រប់កាលៈទេសៈ ។ សារធាតុទាំងនេះ អាចធ្វើឲ្យពុល ប្រសិនបើប៉ះពាល់ហើយ អាចធ្វើឲ្យរំខាន រមាស់ ឬរលាកអាល់ឡែកហ្ស៊ីស្បែក ធ្វើឲ្យខូចស្បែក និងភ្នែករបស់មនុស្ស» ។ ថ្នាំសម្លាប់មេរោគ ឬសារធាតុសម្លាប់មេរោគ ត្រូវប្រើប្រាស់ដោយប្រុងប្រយ័ត្ន សម្រាប់លាងសម្អាតដៃ ទីកន្លែងណាមួយតែប៉ុណ្ណោះ ។ ត្រូវចងចាំថាសារធាតុគ្លរីន ឬសារធាតុសម្លាប់មេរោគផ្សេងៗទៀត ឲ្យឆ្ងាយនិងផុតពីដៃក្មេងប្រយ័ត្នគ្រោះថ្នាក់ ។
លោកស្រីអ្នកនាំពាក្យបានបន្តថា សូមសម្គាល់ថា អាល់កុល ឬជែល អាចប្រើសលាងសំអាតដៃដោយសាប៊ូជាមួយទឹកស្អាត ឫអាល់កុល ឫជែល ដែលជាវិធានការសម្រាប់ការពារការចម្លងវីរុសកូវីដ-១៩ តែមិនត្រូវប្រើសម្រាប់បាញ់លើខ្លួនប្រាណឡើយ ។
