(ភ្នំពេញ) ៖ ករណីបាញ់សម្លាប់លោកវរសេនីយ៍ទោ រ៉េត ស៊ីណែត ក្នុងជម្លោះគ្រោះថ្នាក់ចរាចរណ៍ កាលពីរំលងអធ្រាត្រថ្ងៃទី៣០ ខែធ្នូ ឆ្នាំ២០២០ ដោយអនុវត្តតាមបទបញ្ជារបស់ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ និង ឯកឧត្តម ឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ លោកឧត្តមសេនីយ៍ទោ សុង លី ស្នងការរងទទួលផែនការងារព្រហ្មទណ្ឌ បានដឹកនាំបញ្ជាកម្លាំងសហការជាមួយនាយកដ្ឋានព្រហ្មទណ្ឌក្រសួងមហាផ្ទៃ ដើម្បីធ្វើការស្រាវជ្រាវ និងតាមចាប់ខ្លួន ឃាតក និងបក្ខពួក ដែលបានបាញ់សម្លាប់លោកវរសេនីយ៍ទោ រ៉េត ស៊ីណែត នាយរងការិយាល័យព្រហ្មទណ្ឌកម្រិតស្រាលកាលពីរំលងអធ្រាតចូលថ្ងៃទី៣០ ខែធ្នូ ឆ្នាំ២០២០ ក្នុងករណីជម្លោះគ្រោះថ្នាក់ចរាចរណ៍នៅតាមបណ្តោយមហាវិថីសហព័ន្ធរុស្សី ខណ្ឌពោធិ៍សែនជ័យ ។
បន្ទាប់ពីជំនាញធ្វើការសហការស្រាវជ្រាវ បានធ្វើការកំណត់មុខសញ្ញា និងបានធ្វើការឃាត់ខ្លួនបានអ្នកបើកបររថយន្តម្នាក់ឈ្មោះ កែ ចាន់មាន កាលពីថ្ងៃទី០៣ ខែមករា ឆ្នាំ២០២០ នៅសង្កាត់ទួលតាឯក ក្រុងបាត់ដំបង ខេត្តបាត់ដំបង ។ រហូតមកដល់ពេលនេះសមត្ថកិច្ចជំនាញបានកំពុងតែធ្វើការសហការគ្នាក្នុងការតាមចាប់ខ្លួនឃាតកដើម្បីយកមកផ្តន្ទាទោសតាមច្បាប់ ៕
