បាត់ដំបង ៖ នៅព្រឹកថ្ងៃទី២៦ ខែមករា ឆ្នាំ២០២១ វេលាម៉ោង១០និង៣០នាទី នៅចំណុចភូមិស្រះចក ឃុំសន្តិភាព ស្រុកសំពៅលូន ខេត្តបាត់ដំបង មានករណីផ្ទុះមីនតោន ខណៈដែលបុរសជាអ្នកស៊ីឈ្នួលបើកត្រាក់ទ័រភ្ជួរដីចម្ការឱ្យគេឈ្មោះ ឌុល គង់ ភេទប្រុស អាយុ៤៥ឆ្នាំ មានទីលំនៅបច្ចុប្បន្នភូមិអូរកណ្ដោល ឃុំសន្តិភាព ស្រុកសំពៅលូន ខេត្តបាត់ដំបង បើកបរត្រាក់ទ័រភ្ជួរដីចម្ការឲ្យគេមួយកន្លែង បានកិនចំមីនតោនមួយគ្រាប់ ដែលកប់ទុកក្នុងដីតាំងពីសម័យសង្គ្រាម បណ្តាលឱ្យផ្ទុះឡើងយ៉ាងកក្រើកដី និងបណ្តាលឱ្យខូខាតត្រាក់ទ័រស្ទើរទាំងស្រុង តែគាត់ពិតជាសំណាងក្នុងមួយពាន់គ្រោះថ្នាក់ ដែលមិនប៉ះពាល់ដល់អាយុជីវិត។
បន្ទាប់ពីកើតហេតុភ្លាមៗ ជនរងគ្រោះត្រូវបាននាំយកទៅសង្គ្រោះនៅមន្ទីរពេទ្យបង្អែកស្រុកសំពៅលូន ហើយរហូតដល់ពេលនេះស្ថានភាពជនរងគ្រោះបានល្អប្រសើររួចផុតពីគ្រោះថ្នាក់ដល់ជីវិតហើយ ។
លោកវរសេនីយ៍ឯក ពេជ្រ សារ៉ែន អធិការនគរបាលស្រុកសំពៅលូន បានបញ្ជាក់ថា ដីចម្ការដែលកើតឧប្បត្តិហេតុផ្ទុះមីនតោននាថ្ងៃនេះ គឺជាដីចម្ការដែលម្ចាស់គាត់បានភ្ជួររាស់ដាំដំណាំជាច្រើនឆ្នាំកន្លងមកហើយ មិនដែលមានឧបទ្ទវហេតុបែបនេះទេ ទើបតែពេលនេះក៏ជួបប្រទះនូវឧប្បត្តិហេតុបែបនេះតែម្តង ។
សូមជម្រាបជូនថា ទឹកដីព្រំដែន គឺជាទីតាំងសមរភូមិសង្គ្រាមប្រយុទ្ធគ្នារវាងគាគីខ្មែរពីអតីតកាល ហើយទីនោះនៅបន្សល់ទុកយុទ្ធភ័ណ្ឌមិនទាន់ផ្ទុះកប់នៅក្នុងដី និងនៅលើដីនៅឡើយ ។ យូរៗម្តងឧបទ្ទវហេតុដែលបង្កដោយយុទ្ធភ័ណ្ឌទាំងនេះ តែងបង្កឱ្យកើតនូវសោកនាដកម្មដល់អាយុជីវិតមនុស្ស និងអន្តរាយទ្រព្យសម្បត្តិទៀតផង ៕
ប្រភព៖ អគ្គស្នងការដ្ឋាននគរបាលការពារជាតិ
