កាលពីពេលថ្មីៗនេះ កុមារី១នាក់ កំពុងល្បីល្បាញលើបណ្ដាញសង្គម ដោយសារ​តែនាង​អាច​និយាយបាន​រហូត​ដល់ជាង​១០ភាសា មិនចាញ់​កុមារ ធុ សាលិ នោះទេ។

ផ្អែកតាមវីដេអូ ដែលគេបានចែកចាយតៗគ្នា កុមារីខាងលើអាចនិយាយបានរហូតដល់ ១៤ភាសា រួមមាន៖ អង់គ្លេស បារាំង រុស្ស៊ី ថៃ អេស្បាញ កូរ៉េ វៀតណាម ភីលីពីន ម៉ាឡេស៊ី ជប៉ុន អាល្លឺម៉ង ចិន និងចិនកាតាំង ខណៈនាងក៏ជាក្មេងស្រីក្រីក្រម្នាក់ ដែលរស់នៅ ក្នុងខេត្តសៀមរាប។ កុមារីរូបនេះ មានឈ្មោះថា ភូ ម៉ាលី អាយុ១០ឆ្នាំ កំពុងសិក្សាថ្នាក់ទី ៣ ហើយនៅពេលនាងចេញពីរៀន កុមារីរូបនេះឆ្លៀត ដើរលក់វត្ថុអនុស្សាវរីយ៍សម្រាប់ភ្ញៀវបរទេស ដើម្បីយកថវិកាមកផ្គត់ផ្គង់ចិញ្ចឹមប្អូនៗ ដល់ទៅ ៦នាក់។

បើនិយាយពីជីវភាពរបស់កុមារីរូបនេះវិញ គឺមានជីវភាពខ្វះខាតយ៉ាងខ្លាំ ក្នុងនោះនាងក៏បានទទួលអាហាររូបករណ៍ពីសាលា ដែលនាងកំពុងរៀនផងដែរ និងទទួលបានអំណោយជាច្រើនផ្សេងៗទៀតពីសប្បុរសជន ដែលអាណិតស្រលាញ់រូបនាង ។ កុមារីរូបនេះ បានបញ្ជាក់ថា ក្នុងមួយថ្ងៃនាងរកបានត្រឹមតែ ៤ ទៅ ៥ដុល្លារតែប៉ុណ្ណោះ ដោយត្រូវដើរលក់វត្ថុអនុស្សាវរីយ៍បន្ទាប់ពីទំនេរពីការសិក្សារ។

ទាក់ទងទៅនិងរឿងរបស់ប្អូនស្រីនេះដែរ ក៏មានមនុស្សជាច្រើនរង់ចាំមើលវាសនារបស់កុមារីរូបនេះ ថាតើអាចមានវាសនាដូច កុមារា ធុចសាលិ រឺអត់ ? តើវាសនារបស់កុមារីរូបនេះ ទៅជាយ៉ាងណា ?

គួរបញ្ជាក់ថា កន្លងមក​កុមារាកម្ពុជាមួយរូប ឈ្មោះថា ធុច សាលិ ដែលមានសមត្ថភាពពិសេស អាចនិយាយបានរហូតដល់ទៅ១៥ភាសា ធ្វើឲ្យផ្ទុះភាពល្បីល្បាញយ៉ាងខ្លាំងនៅក្នុងប្រទេសកម្ពុជា ក៏ដូចជានៅក្រៅប្រទេស ។ ដោយសារតែ ធុច សាលិ មានភាពវ័យឆ្លាត និងមានទេពកោសល្យពិសេសផងនោះ ទីបំផុតរូបគេ ត្រូវបានបញ្ជូនឲ្យទៅសិក្សានៅសាលា ដ៏ល្បីមួយ នៅប្រទេសចិន ក្រោមការជួយឧបត្ថម្ភពីសាលាអន្ដរជាតិមួយ៕