(ភ្នំពេញ)៖ សម្ដេចតេជោ ហ៊ុន សែន នាយករដ្ឋមន្ត្រីកម្ពុជាបាន យល់ព្រមឲ្យបណ្ដេញជនបរទេសចេញពីកម្ពុជា និងជនជាតិខ្មែរចាត់វិធានការតាមផ្លូវច្បាប់ ចំពោះការមិនសហការផ្ដល់ព័ត៌មាននិងរត់គេចមិនព្រមធ្វើចត្តាឡីស័ក។
ការយល់ព្រមរបស់សម្ដេចតេជោ ហ៊ុន សែន បានធ្វើឡើងតាមសំណើរបស់ឯកឧត្តមឧត្តមសេនីយ៍ឯកឌី វិជ្ជា អនុប្រធានគណៈកម្មការស្រាវជ្រាវនិងតាមដានបុគ្គលសង្ស័យថាមានផ្ទុកជំងឺកូវីដ១៩។
យោងតាមលិខិតរបស់ឯកឧត្តមឧត្តមសេនីយ៍ឯកឌី វិជ្ជា ចុះថ្ងៃទី២២ ខែកុម្ភៈ បានជម្រាបជូនសម្តេចតេជោ ហ៊ុន សែន ថា កន្លងមកក្នុងព្រឹត្តិការណ៍ ០៣វិច្ឆិកា ២៨វិច្ឆិកា និងព្រឹត្តិការណ៍ ២០កុម្ភៈ អនុគណៈកម្មការស្រាវជ្រាវ និងតាមដានបុគ្គលសង្ស័យថា មានផ្ទុកជំងឺកូវីដ១៩ (COV10-19) តែងតែជួបប្រទះនូវបញ្ហាប្រឈម មួយចំនួនក្នុងប្រតិបត្តិការរបស់ខ្លួន ក្នុងនោះមាន បញ្ហាបុគ្គលជាប់ពាក់ព័ន្ធនឹងជំងឺកូវីដ១៩ មិនព្រមសហការ ផ្តល់ការសម្ភាសន៍ ផ្តាច់ទំនាក់ទំនង និងករណីរត់គេចមិនព្រមធ្វើចត្តាឡីស័ក ព្រមទាំងទីតាំងមិនសហការ ចំពោះកិច្ចប្រតិបត្តិការស្រាវជ្រាវ និងតាមដានបុគ្គលផ្ទុកជំងឺកូវីជ១៩ ដែលធ្វើអោយប្រតិបត្តិការមានភាពយឺតយ៉ាវ និងខ្វះចន្លោះ។
សំណើរខាងលើ បានបន្តថា ដើម្បីពង្រឹងប្រសិទ្ធភាពការងារទប់ស្កាត់ការរីករាលដាលនៃជំងឺកូរឹង១៩ ក្នុងសហគមន៍ អនុគណៈកម្មការស្រាវជ្រាវ និងតាមដានបុគ្គលសង្ស័យថា មានផ្ទុកជំងឺអូវីដ១៩ (COVID-19) ឯកឧត្តមឧត្តមសេនីយ៍ឯកឌី វិជ្ជ បានស្នើសុំគោលការណ៍ដ៏ខ្ពង់ខ្ពស់ពី សម្តេចអគ្គមហាសេនាបតីតេជោ អនុវត្តនូវវិធានការច្បាប់បន្ថែមចំពោះបុគ្គល និងទីតាំងដែលមិនសហការនូវវិធានការមួយចំនួនដូចខាងក្រោម៖ ១. ចំពោះជនបរទេសសូមគោរពស្នើសុំ បណ្តេញចេញពីព្រះរាជាណាចក្រកម្ពុជា និងហាមចូល ប្រទេសសារជាថ្មី, ២. ចំពោះជនជាតិខ្មែរ សូមគោរពស្នើសុំចាត់វិធានការតាមផ្លូវច្បាប់, និង៣. ចំពោះទីតាំងសូមដកហូតអាជ្ញាប័ណ្ណ និងបិទអាជីវកម្មក្នុងទីតាំង។
ជាមួយគ្នានោះ ចំពោះការស្នើនេះ សម្តេចតេជោ ហ៊ុន សែន បានចារយល់ព្រមលើលិខិតស្នើសុំខាងលើ ៕
ប្រភព:ក្រសួងព័ត៌មាន
