ទើបតែប៉ុន្មាននាទីមុននេះប៉ុណ្ណោះ លោក ណុប បាយ៉ារិទ្ធ បានចេញមកបញ្ជាក់ប្រាប់ប្រិយមិត្តអ្នកគាំទ្ររបស់លោកថា ពេលនេះបានតេស្តឃើញវិជ្ជមានកូវីដ-១៩ ដែរហើយ។
ការចេញមកគូសបញ្ជាក់របស់តារាចម្រៀងរៀមច្បងក្នុងផលិតកម្មហង្សមាស គឺក្រោយតែប៉ុន្មានម៉ោងប៉ុណ្ណោះ ដែលប្អូនប្រុសរបស់លោកចេញមកនិយាយថា បងប្រុសរបស់លោក មិនទាន់មានលទ្ធផលពីករណីនេះនៅឡើយទេ ក្រោយពីគ្រូពេទ្យបានយកសំណាករួចរាល់។
ប៉ុន្តែប្រមាណ ៥នាទីមុននេះ សាមីខ្លួនតារាចម្រៀងតែម្ដង បានចេញមកស្រាយបំភ្លឺថា លទ្ធផលពិនិត្យសំណាកបានចេញមក បង្ហាញថាលោក ពិតជាមានវិជ្ជមានមេរោគសាហាវនេះមែន។
” ខ្ញុំកំពុងរៀបចំសម្លៀកបំពាក់ និងរង់ចាំរថយន្តខាងក្រសួងសុខាភិបាលមកទទួលអរគុណសម្រាប់ការព្រួយបារម្ភរបស់បងប្អូន ខ្ញុំត្រូវតែរឹងមាំយកឈ្នះជំងឺនេះដោយការព្យាបាលពីគ្រូពេទ្យអោយបាន ខ្ញុំមិនតក់ស្លុតនិងការពិតនេះទេ ត្បិតខ្ញុំក្តី អ្នកដែលខ្ញុំឆ្លងពីគាត់ក្តី គ្មានអ្នកណារីករាយចង់ទទួលឡើយ មានតែពាក្យមួយប្រាប់ខ្លួនឯងគឺរឹងមាំ តស៊ូ!”។ ណុប បាយ៉ារិទ្ធ ថ្លែង។
គិតត្រឹមពេលនេះ លោក ណុប បាយ៉ារិទ្ធ គឺជាសិល្បករទី២ហើយ ដែលរកឃើញវិជ្ជមានកូវីដ១៩ បន្ទាប់ពីអ្នកនាង កែវ ច័ន្ទនិមល បានទទួលស្គាល់ជាផ្លូវការក្រោយមានចចាមអារ៉ាមតាំងពីយប់មិញមក៕
ប្រភព: Sabay
