ឯកឧត្ដម ទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុករំដួលខេត្ដស្វាយរៀងបានចុះសួរសុខទុក្ខបងប្អូនកម្មករកម្មការិនីរោងចក្រ ដែលបានជួបឧប្បត្តិហេតុគ្រោះថ្នាក់ក្រឡាប់រថយន្តឈ្នួលនៅក្រុងបាវិតនិងកំពុងសម្រាកព្យាបាលនៅមន្ទីរពេទ្យស្រុកប្រតិបត្តិជីភូ ក្នុងខេត្ដស្វាយរៀង នាព្រឹកថ្ងៃទី១២ ខែមីនា ឆ្នាំ២០២១។ នេះបើតាមហ្វេសប៊ុកផ្លូវការរបស់ឯកឧត្ដម ទេសរដ្ឋមន្រ្តី លី ធុជ។
ឯកឧត្ដមទេសរដ្ឋមន្រ្តី លី ធុជ បានពាំនាំសេចក្ដីសាកសួរសុខទុក្ខពីលោកជំទាវកិត្តិសង្គហបណ្ឌិត ម៉ែន សំអនប្រធានក្រុមការងាររាជរដ្ឋាភិបាលចុះមូលដ្ឋានខេត្តស្វាយរៀងជូនចំពោះបងប្អូនកម្មករ កម្មការិនី ក៏ដូចជាអ្នកជំងឺដទៃទៀតដែលកំពុងសម្រាកព្យាបាលនៅមន្ទីរពេទ្យស្រុកប្រតិបត្តិជីភូ។ ឯកឧត្ដម ទេសរដ្ឋមន្រ្តីបានសម្ដែងនូវការសោកស្ដាយចំពោះឧប្បត្តិហេតុគ្រោះថ្នាក់នេះ ដែលបង្កឱ្យបងប្អូនកម្មករកម្មការិនីរងរបួស ខាតបង់ទាំងពេលវេលា និងថវិកាដោយសារការធ្វេសប្រហែសបន្តិចបន្តួចនេះ និងសូមជូនពរឱ្យបងប្អូនកម្មករទាំងអស់ឆាប់ជាសះស្បើយ។
ជាមួយគ្នានេះ ឯកឧត្ដមទេសរដ្ឋមន្រ្តីក៏បានស្នើសុំឱ្យលោកគ្រូ-អ្នកគ្រូពេទ្យយកចិត្តទុកដាក់ពិនិត្យ និងព្យាបាលជំងឺជូនបងប្អូនយើង ឱ្យឆាប់ជាសះស្បើយនិងបានវិលត្រឡប់ទៅផ្ទះ ហើយចូលបំពេញការងារវិញ។ ឯកឧត្ដម ទេសរដ្ឋមន្រ្តីបានចាត់ទុកបងប្អូនកម្មករទាំងអស់ ជាផ្នែកមួយជួយលើកកម្ពស់ដល់កំណើនសេដ្ឋកិច្ចជាតិ ផងដែរ។ ឯកឧត្ដម ទេសរដ្ឋមន្រ្តី លី ធុជ ក៏បានឧបត្ថម្ភជែលលាងដៃជូនមន្ទីរពេទ្យស្រុកប្រតិបត្តិជីភូនិងថវិកាមួយចំនួនជូនដល់កម្មករ កម្មការិនីដែលរងរបួសដោយសារគ្រោះថ្នាក់ចរាចរណ៍នេះ។
សូមបញ្ជាក់ផងដែរថា កាលពីព្រឹកថ្ងៃទី១២ ខែមីនា ឆ្នាំ២០២១វេលាម៉ោង ៦៖ ២០ នាទី មានករណីគ្រោះថ្នាក់ចរាចរណ៍ ស្ថិតក្នុងភូមិព្រៃផ្តៅ សង្កាត់ច្រកម្ទេស ក្រុងបាវិត ខេត្តស្វាយរៀង បានក្រឡាប់ធ្លាក់កម្មករ បណ្តាលឱ្យរងរបួស ៥៣នាក់ រងរបួសធ្ងន់ ០៧នាក់។បច្ចុប្បន្នអ្នករងរបួសស្រាលកំពុងសម្រាកព្យាបាលមន្ទីរពេទ្យជីភូ ចំនួន ៣៦នាក់ នៅមន្ទីរពេទ្យពន្លឺបូព៌ាបាវិត ១០នាក់ និងអ្នករងរបួសធ្ងន់សម្រាកព្យាបាលនៅមន្ទីរពេទ្យខេត្ត ០៧ នាក់៕
ប្រភព៖ ក្រសួងព័ត៌មាន
