ក្នុងនាមលោកជំទាវកិត្តិសង្គហបណ្ឌិតម៉ែន សំអន រដ្ឋមន្រ្ដីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តស្វាយរៀង ឯកឧត្ដមទេសរដ្ឋមន្រ្តី លី ធុជ អនុប្រធានទី១ អាជ្ញាធរមីន និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុករំដួល ខេត្ដស្វាយរៀងបានអញ្ជើញចុះសួរសុខទុក្ខក្រុមគ្រូពេទ្យ កងកម្លាំងប្រដាប់អាវុធនិងប្រជាពលរដ្ឋដែលកំពុងធ្វើចត្តាឡីស័កនៅក្រុងបាវិត ដែលបាននាំយកសម្ភារប្រើប្រាស់ ព្រមទាំងថវិកាមួយចំនួន ដើម្បីប្រគល់ជូនក្រុមគ្រូពេទ្យនៅទីនោះ។ នេះបើតាមការលើកឡើងរបស់ឯកឧត្ដមទេសរដ្ឋមន្រ្តី លី ធុជ តាមរយៈហ្វេសប៊ុកផ្លូវការ នាថ្ងៃទី១២ ខែមីនា ឆ្នាំ២០២១។
ឯកឧត្ដម ទេសរដ្ឋមន្រ្តី លី ធុជ បានវាយតម្លៃខ្ពស់ចំពោះកិច្ចខិតខំប្រឹងប្រែងទាំងកម្លាំងកាយកម្លាំងចិត្ត របស់ក្រុមគ្រូពេទ្យ ដែលបានយកចិត្តទុកដាក់ពិនិត្យនិងព្យាបាលជំងឺរបស់បងប្អូនប្រជាពលរដ្ឋជាពិសេសការចំណាយពេលវេលាទាំងយប់ ទាំងថ្ងៃក្នុងការងារធ្វើចត្តាឡីស័កនិងព្យាបាលអ្នកឆ្លងជំងឺកូវីដ-១៩ ដែលកំពុងរីករាលដាលយ៉ាងខ្លាំង គួរឱ្យព្រួយបារម្ភនៅកម្ពុជាយើងនេះ។ ឯកឧត្ដម ទេសរដ្ឋមន្រ្តីបានចាត់ទុកក្រុមគ្រូពេទ្យ ជាកងទ័ពជួរមុខក្នុងការងារប្រយុទ្ធប្រឆាំងនឹងជំងឺឆ្លងកូវីដ-១៩ នៅកម្ពុជា។
ឯកឧត្ដម ទេសរដ្ឋមន្រ្តីក៏បានអំពាវនាវឱ្យបងប្អូនប្រជាពលរដ្ឋទាំងអស់ត្រូវបន្តចូលរួមអនុវត្តន៍តាមអនុសាសន៍ណែនាំដ៏ខ្ពង់ខ្ពស់របស់សម្តេចតេជោនាយករដ្ឋមន្ត្រីនូវវិធានការ «៣ការពារ ៣កុំ» ឱ្យបានល្អប្រសើរ ចៀសវាងការឆ្លងពីជំងឺកូវីដ-១៩។
ជាមួយគ្នានេះ ឯកឧត្ដមទេសរដ្ឋមន្រ្តី លី ធុជ បាននាំយកមកនូវសម្ភារប្រើប្រាស់និងថវិកាមួយចំនួន ប្រគល់ជូនក្រុមគ្រូពេទ្យ និងកងកម្លាំងប្រដាប់អាវុធដើម្បីសម្រួលដល់ការរៀបចំនិងគ្រប់គ្រងក្នុងការធ្វើចត្តាឡីស័កនៅមូលដ្ឋានក្រុងបាវិតខេត្ដស្វាយរៀង៕
ប្រភព៖ ក្រសួងព័ត៌មាន
