(ភ្នំពេញ)៖ នាថ្ងៃទី ៣០ ខែមីនា ឆ្នាំ២០២១នេះ អគ្គនាយកដ្ឋានទូរទស្សន៍ជាតិ បានចេញលិខិតបដិសេធទាំងស្រុងចំពោះ Group TVK និងទទក ២ (TVK2) ជាករណីក្លែងបន្លំ ដែលមិនមែនជាកម្មសិទ្ធរបស់ (ទទក)ឡើយ។
ក្នុលិខិតបដិសេធ ខាងលើនោះ បានបញ្ជាក់ថា រយៈពេលកន្លងនេះ អគ្គនាយកដ្ឋានទូរទស្សន៍ជាតិកម្ពុជា បានសង្កេតឃើញថា មានបុគ្គលឬក្រុមមួយបាន លួចបង្កើតនិងប្រើប្រាស់គ្រុបចំនួន ២ ដោយប្រើប្រាស់ឡូហ្គោទទកគឺ Group TVK និងទទក ២ (TVK2) ផ្សព្វផ្សាយព័ត៌មាន និងដំណឹងមិនពិត ឬក្លែងក្លាយ និងមានលក្ខណៈញុះញូងដល់សាធារណៈជន និងធ្វើអោយសាធារណៈជនមានការភ័ន្តច្រលំថា ជាទង្វើរបស់អគ្គនាយកដ្ឋានទូរទស្សន៍ជាតិកម្ពុជា។
ទាក់ទិននឹងករណីនេះ អគ្គនាយកដ្ឋានទូរទស្សន៍ជាតិកម្ពុជា បានប្រកាសបដិសេធទាំងស្រុងចំពោះ Group TVK និងទទក ២(TVK2) ដែលបានក្លែងបន្លំនោះមិនមែនជាកម្មសិទ្ធរបស់ (ទទក) ទេនិងមិនទទួលខុសត្រូវរាល់ការផ្សព្វផ្សាយព័ត៌មានទាំងអស់នៅលើគ្របទាំង ២ នេះទេ។
ជាមួយគ្នានោះ អគ្គនាយកដ្ឋានទូរទស្សន៍ជាតិកម្ពុជា បានស្នើដល់សមត្ថកិច្ចជំនាញ ចាត់វិធានការផ្លូវច្បាប់ វែកមុខបុគ្គល ឬក្រុមដែលបានលួចក្លែងបន្លំបង្កើតគ្រុបទាំង២ នេះមកដាក់ទោសតាមច្បាប់នៃព្រះរាជាណាចក្រកម្ពុជា៕
ប្រភព៖ ក្រសួងព័ត៌មាន
