មន្រ្ដីជាន់ខ្ពស់ក្រសួងយុត្តិធម៌បានគូសបញ្ជាក់ថា ក្រសួងនឹងបើកកិច្ចប្រជុំមួយដើម្បីពិនិត្យ និងពិភាក្សាលើសំណើសុំលើកលែងនិងបន្ធូរបន្ថយទោសទណ្ឌិតចំនួន៥៤២នាក់ ក្នុង ឱ កាសបុណ្យចូលឆ្នាំថ្មីប្រពៃណីជាតិខ្មែរដែលនឹងឈានចូលមកដល់នៅពេលខាងមុខនេះ។ នេះបើ​យោងតាមការបញ្ជាក់របស់ឯកឧត្ដម គឹម សន្ដិភាព រដ្ឋលេខាធិការ​ និងជាអ្នកនាំ​ពាក្យ​​​ក្រសួង​​យុត្តិធម៌តាមរយៈហ្វេសប៊ុកផ្លូវការ។

ឯកឧត្ដម គឹម សន្តិភាព បានលើកឡើងថា នៅថ្ងៃទី ៣១ ខែមីនា ឆ្នាំ២០២១ វេលាម៉ោង ២៖ ៣០ នាទីរសៀល ឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៌ និងជាប្រធាន​គណៈកម្មការថ្នាក់ជាតិពិនិត្យ និងវាយតម្លៃបញ្ជីឈ្មោះទណ្ឌិតស្នើសុំបន្ធូរបន្ថយទោស និង​លើកលែងទោស នឹងដឹកនាំកិច្ចប្រជុំគណៈកម្មការថ្នាក់ជាតិ ដោយធ្វើឡើងតាមប្រព័ន្ធ​អេឡិចត្រូនិក(ZOOM) ដើម្បីពិនិត្យបញ្ជីឈ្មោះទណ្ឌិតដែលបានស្នើសុំបន្ធូរបន្ថយទោស និង​លើកលែងទោសក្នុង ឱកាស ពិធីបុណ្យចូលឆ្នាំប្រពៃណីជាតិខ្មែរ ឆ្នាំ២០២១ ដែល​នឹង​ប្រព្រឹត្តទៅពីថ្ងៃទី ១៤ ១៥ និងថ្ងៃទី១៦ ខែមេសា ឆ្នាំ២០២១ ខាងមុខនេះ ។ ឯកឧត្ដម​បាន បន្តថា កិច្ចប្រជុំនេះធ្វើឡើងតាមសំណើសុំពីគណៈកម្មការរាជធានី ខេត្ត​ចំនួន២៣ ​(ពន្ធ នាគាររាជធានី-ខេត្តចំនួន ២៣) និងគណៈកម្មការក្រសួងមហាផ្ទៃ (មណ្ឌលអប់រំ កែប្រែ ទាំង ៤) សរុបទណ្ឌិតមានចំនួន ៥៤២នាក់ (ស្រី ៦៨ នាក់) ក្នុងនោះមាន ស្នើសុំ​លើក លែង ទោសចំនួន ៧០ នាក់ (ស្រី ០៩នាក់)។ ទន្ទឹមនេះ ស្នើសុំបន្ធូរបន្ថយទោសចំនួន ៤៧២ នាក់ (ស្រី ៥៩ នាក់) ។

សូមរម្លឹកដែរថា កន្លងមក ព្រះមហាក្សត្របានចេញព្រះរាជក្រឹត្យកំណត់ពិធីបុណ្យ សំខាន់ៗមួយចំនួន សម្រាប់ការបន្ធូរបន្ថយ និងលើកលែងទោសដល់ទណ្ឌិត ដើម្បីធ្វើ​សមាហរណកម្មទណ្ឌិតទាំងនោះឱ្យបានទៅរស់នៅក្នុងសង្គមវិញ ឬក្នុងគោលបំណង​មនុស្សធម៌។ ក្នុងព្រះរាជក្រឹត្យ ស្ដីពីការបន្ធូរបន្ថយទោស​និងលើកលែងទោសដល់​ទណ្ឌិត​នៅក្នុងប្រទេសកម្ពុជា ចុះថ្ងៃទី១២ ខែមករា ឆ្នាំ២០២១ ដែលឡាយព្រហស្តលេខាដោយ ព្រះករុណា ព្រះបាទ សម្ដេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជា​ណា​ចក្រ​កម្ពុជាបានឱ្យដឹងថា សម្រាប់ពិធីបុណ្យដែលអាចស្នើសុំការបន្ធូរបន្ថយទោស និង ការលើកលែងទោសនោះ ត្រូវកំណត់ ៥ដងក្នុងមួយឆ្នាំ រួមមាន ទិវាជ័យជម្នះលើរបប ប្រល័យពូជសាសន៍ ពិធី​បុណ្យ​ចូលឆ្នាំខ្មែរ បុណ្យវិសាខបូជា បុណ្យឯករាជ្យជាតិ និងព្រះ រាជពិធីបុណ្យអុំទូក។ ជាមួយ​គ្នានេះ សម្រាប់ការបន្ធូរបន្ថយទោស និងលើកលែងទោស នេះ ក៏អាចធ្វើបានដែរក្នុង ពិធីបុណ្យ ឬព្រឹត្តិការណ៍ធំៗរបស់ជាតិផងដែរ៕

ប្រភព៖ ក្រសួងព័ត៌មាន