កំពង់ឆ្នាំង៖ នៅព្រឹកថ្ងៃទី១២ ខែឧសភា ឆ្នាំ២០២១នេះ សមត្ថកិច្ចបានទម្លាយការស៊ើបអង្កេតលើករណីអគ្គិភ័យដែលបានសម្លាប់មួយគ្រួសារមានប្រពន្ធ និងកូនរហូតដល់ ០៦ នាក់ ការពិតឃាតករ ជាប្តីរបស់ជនរងគ្រោះ។ ការស៊ើបអង្កេតនេះក្រោមកិច្ចសហការរបស់អង្គភាពការពារកុមារ (CPU) ជាមួយស្នងការដ្ឋាននគរបាលខេត្តកំពង់ឆ្នាំង និងនាយកដ្ឋានបច្ចេកទេស និងវិទ្យាសាស្រ្តនៃក្រសួងមហាផ្ទៃ បានរួមគ្នាបង្កើតក្រុមការងារចម្រុះ ECHO21។
លោកឧត្តមសេនីយ៍ត្រី អៀរ ប៊ុនធឿន ស្នងការរង និងជាអ្នកនាំពាក្យ នៃស្នងការដ្ឋាននគរបាលខេត្តកំពង់ឆ្នាំង បានឲ្យដឹងបឋមថា៖ តាមចម្លើយសារភាពនៅមុខសមត្ថកិច្ចជំនាញ ឈ្មោះ នុន សារ៉េត អាយុ៣៨ឆ្នាំ គឺជាឃាតករ និងជាអ្នកដុតផ្ទះសម្លាប់ប្រពន្ធកូនខ្លួនឯងរហូតដល់ ៦នាក់ ទាំងកូនក្នុងផ្ទៃ។ ទោះជាយ៉ាងណាជនសង្ស័យស្ថិតក្រោមការឃាត់ខ្លួន និងសួរនាំបន្ថែមរបស់សមត្ថកិច្ចជំនាញនៅឡើយ។
គួរបញ្ជាក់ថា៖ ហេតុការណ៍អគ្គិភ័យលេបត្របាក់ផ្ទះអស់មួយខ្នង រួមទាំងនាំជីវិតមនុស្ស ០៦នាក់ កើតឡើងកាលពីវេលាម៉ោង០៨និង៣០នាទីយប់ ថ្ងៃទី៩ ខែឧសភា ឆ្នាំ២០២១ ស្ថិតនៅភូមិដើមជ្រែ ឃុំខុនរ៉ង់ ស្រុកបរិបូណ៌ ។ ក្មេងទាំង ៤នាក់ មានអាយុ៩ឆ្នាំ ១នាក់, កូនភ្លោះ ៧ឆ្នាំ នាក់ និង៣ឆ្នាំ ១នាក់ និងកូនក្នុងផ្ទៃម្នាក់ ព្រមទាំងម្តាយរបស់ពួកគេ បានបាត់បង់ជីវិតនៅក្នុងឧប្បត្តិហេតុគួរឲ្យរន្ធត់សោកសង្រែងនេះ។
បច្ចុប្បន្ន ជនសង្ស័យត្រូវបានឃាត់ខ្លួនដើម្បីសួរនាំបន្ថែម និងបញ្ជូនសំណុំរឿងទៅតុលាការចាត់ការតាមច្បាប់៕
