ក្នុងអំឡុងពេល​ពិភាក្សា​តាម​ទូរស័ព្ទ​ជាមួយ​រដ្ឋមន្ត្រីការបរទេស​ប៉ា​គី​ស្ថាន លោក Shah Mahmood Qureshi សមាជិក​ក្រុមប្រឹក្សារដ្ឋ​ចិន និង​ជា​រដ្ឋមន្ត្រីការបរទេស​ចិន លោក វ៉ាង យី កាលពី​ថ្ងៃ​សៅរ៍​បាន​លាតត្រដាង​អំពី​ជំហរ​របស់​ប្រទេស​ចិន​ចំពោះ​ជម្លោះ​រវាង​ប៉ា​ឡេ​ស្ទី​ន – អ៊ីស្រាអែល នាពេល​បច្ចុប្បន្ននេះ​។​

​លោក វ៉ាង បាន​និយាយ​មុនពេល​ធ្វើ​បទ​បង្ហាញ​អំពី​ទស្សនៈ​របស់​ប្រទេស​ចិន និង​សំណើ​ទៅលើ​បញ្ហា​នោះ​ថា នៅក្នុង​រយៈពេល​ប៉ុន្មាន​ថ្ងៃ​ថ្មីៗ​នេះ ជម្លោះ​រវាង​អ៊ីស្រាអែល និង​ប៉ា​ឡេ​ស្ទី​ន​បាន​កើនឡើង​ឥតឈប់ឈរ ដែល​បណ្តាលឱ្យមាន​មនុស្ស​ស្លាប់ និង​របួស​យ៉ាងច្រើន ដែល​កំពុងមាន​ការបា​រ​ម្ភ​យ៉ាងខ្លាំង​។​

​ទីមួយ លោក វ៉ាង បាន​និយាយថា ដើមហេតុ​នៃ​ការកើនឡើង​នៃ​ស្ថានភាព​នេះ គឺ​ដោយសារ​ការមិន​មាន​ដំណោះស្រាយ​ណាមួយ​អស់​រយៈពេល​ជា​យូរ​មកហើយ ដែល​អាច​ដោះស្រាយ​បញ្ហា​ប៉ា​ឡេ​ស្ទី​ន​បាន​។​

​លោក វ៉ាង បាន​និយាយថា ជាពិសេស​ក្នុង​រយៈពេល​ប៉ុន្មាន​ឆ្នាំ​ថ្មីៗ​នេះ ដំណើរការ​សន្តិភាព​នៅ​ម​ជ្ឈឹ​ម​បូព៌ា​បាន​ឃ្លាតឆ្ងាយ​ពី​ផ្លូវ​ដើម ហើយ​ដំណោះស្រាយ​របស់​ក្រុមប្រឹក្សាសន្តិសុខ​អង្គការសហប្រជាជាតិ​មិន​ត្រូវបាន​អនុវត្ត​ដោយ​យកចិត្តទុកដាក់​នោះទេ ជាពិសេស​សិទ្ធិ​របស់​ប៉ា​ឡេ​ស្ទី​ន​ក្នុង​ការកសាង​រដ្ឋ​ឯករាជ្យ​មួយ​ត្រូវបាន​រំលោភបំពាន​ជា​បន្តបន្ទាប់ និង​ស្ថានភាព​លំបាក​របស់​ប្រជាជន​ប៉ា​ឡេ​ស្ទី​ន​ដែលនាំឱ្យ​កាន់តែ​អាក្រក់​ឡើងៗ​នៃ​ការប្រឈមមុខ​របស់​ប៉ា​ឡេ​ស្ទី​ន និង​អ៊ីស្រាអែល ព្រមទាំង​ការ​ជម្លោះ​ម្តង​ហើយ​ម្តងទៀត​។​

​ដូចដែល​ត្រូវបាន​បង្ហាញឱ្យឃើញ លោក វ៉ាង បាន​កត់សម្គាល់ថា បើ​គ្មាន​ដំណោះស្រាយ​ពិតប្រាកដ​នៃ​បញ្ហា​ប៉ា​ឡេ​ស្ទី​ន​ទេនោះ ប៉ា​ឡេ​ស្ទី​ន និង​អ៊ីស្រាអែល ក៏ដូចជា​ម​ជ្ឈឹ​ម​បូព៌ា​នឹង​មិនអាច​ទទួលបាន​ស​ន្តិ​ភាព​ពិតប្រាកដ​នោះទេ​។​

​ទី​ពីរ លោក វ៉ាង បាន​និយាយថា អ្វីដែល​កំពុង​គាបសង្កត់​ពេលនេះ គឺ​បទ​ឈប់​បាញ់​គ្នា និង​ការបញ្ឈប់​អំពើ​ហឹ​ង្សា ហើយ​ក្រុមប្រឹក្សាសន្តិសុខ​ត្រូវមាន​ទំនួល​ខុសត្រូវ​ក្នុងការ​ស្វែងរក​ការ​ដំណោះស្រាយ​ទាំងនោះ​ឱ្យបាន​ឆាប់​។​

​លោក​បាន​និយាយ​បន្ថែមថា ប្រទេស​ចិន​ក្នុងនាម​ជា​ប្រធាន​ក្រុមប្រឹក្សា​សន្តិសុខសម្រាប់​ខែឧសភា បាន​ជំរុញ​ឱ្យ​ក្រុមប្រឹក្សា​នេះ​ធ្វើ​កិច្ច​ពិគ្រោះ​យោបល់​ជាបន្ទាន់​ចំនួន​ពីរ ស្តីពី​ជម្លោះ​រវាង​ប៉ា​ឡេ​ស្ទី​ន – អ៊ីស្រាអែល និង​បានធ្វើ​សេចក្តីព្រាង​សេចក្តីប្រកាស​ព័ត៌មាន​ក្នុង​គោលបំណង​ដើម្បី​ដឹកនាំ​ក្រុមប្រឹក្សា​នេះ​ឱ្យ​អនុវត្ត​សកម្មភាព​ទាំងនោះ​។​

​ទី​បី លោក វ៉ាង បាន​និយាយថា មធ្យោបាយ​ចុងក្រោយ​មួយ​ចេញពី​បញ្ហា​ប៉ា​ឡេ​ស្ទី​ន គឺ​ស្ថិតនៅក្នុង​ការអនុវត្ត​ដំណោះស្រាយ​រវាង​រដ្ឋ​ទាំងពីរ​។ ប្រទេស​ចិន​នឹង​ធ្វើជា​ម្ចាស់ផ្ទះ​នៃ​ការជជែក​ដេញដោល​គ្នា​ដោយ​បើកចំហ​ទៅលើ​បញ្ហា​ជម្លោះ​រវាង​ប៉ា​ឡេ​ស្ទី​ន – អ៊ីស្រាអែល នៅឯ​ក្រុមប្រឹក្សាសន្តិសុខ​អង្គការសហប្រជាជាតិ ហើយ​រំពឹងថា​គ្រប់ភាគី​ទាំងអស់​នឹង​បញ្ចេញ​សំឡេង​រួមគ្នា​លើ​បញ្ហា​នេះ​។​

​លោក វ៉ាង បាន​និយាយ​បន្ថែមថា ប្រទេស​ចិន​មាន​យោបល់​ថា ក្រុមប្រឹក្សាសន្តិសុខ​គួរតែ​បញ្ជាក់​ឡើងវិញ​នូវ​ដំណោះស្រាយ​រវាង​រដ្ឋ និង​ជំរុញ​ឱ្យ​ប៉ា​ឡេ​ស្ទី​ន និង​អ៊ីស្រាអែល​បន្ត​កិច្ចចរចា​សន្តិភាព​ដោយ​ឈរលើ​មូលដ្ឋាន​នៃ​ដំណោះស្រាយ​រវាង​ប្រទេស​ទាំងពីរ​ឱ្យបាន​ឆាប់​តាម​ដែល​អាចធ្វើ​ទៅបាន​៕

ប្រភព៖ ក្រសួងព័ត៌មាន