ដើម្បីទប់ស្កាត់ការឆ្លងកូវីដ-១៩ គួរជម្រុញឲ្យមានអន្តរាគមន៍បន្ថែម នេះបើ តាម WHO ប្រចាំកម្ពុជាបានលើកឡើង

279

(ភ្នំពេញ)៖ ខណៈពេលនេះប្រទេសកម្ពុជា​កំពុងស្ថិត​នៅក្នុង​ដំណាក់កាល​សំខាន់ ​នៅក្នុង​ការប្រយុទ្ធប្រឆាំង​នឹង​ជំងឺ​កូ​វីដ១៩ ដែល​អង្គការ​សុខភាព​ពិភពលោក(WHO)​ បាន​ជំរុញ​ឱ្យ​មាន​អន្តរាគមន៍​បន្ថែម ដែលមាន​ប្រសិទ្ធភាព​ជាង​មុន និង​អំពាវនាវ​ឲ្យ​មានការ​ចូលរួម​ពី​សហគមន៍​ឱ្យ​បាន​ច្រើន​ដើម្បី​ទប់ស្កាត់​ការចម្លង​ជំងឺ​​នេះ​។អង្គការ​សុខភាព​ពិភពលោក​ប្រចាំ​កម្ពុជា បានចេញ​សេចក្តីប្រកាស​ព័ត៌មាន​មួយ​នៅ​រសៀល​ថ្ងៃទី ១៣ ខែមិថុនា​មិ្សលមិញនេះដោយបាន​ជំរុញ​ឱ្យមាន​សកម្មភាព​រួមគ្នា និង​ការចូលរួម​របស់​សហ​គម​ន៍​ទាំងមូល។

សេចក្តីប្រកាសនោះ​បានលើកឡើង​ថា ៖ «សកម្មភាព​រួម​របស់​យើង និង​ការចូលរួម​របស់​សហ​គម​ន៍​ទាំងមូល​នៅ​ថ្ងៃនេះ កំណត់​នូវ​អ្វីដែល​នឹង​កើតឡើង​ នៅ​ថ្ងៃស្អែក ដែល​នឹង​អាចជា​ការកើនឡើង​នូវ​ចំនួន​ករណី​ឆ្លង និង​ចំនួន​ករណី​ស្លាប់ ឬក៏​ជាការ​ធ្លាក់ចុះ​នៃ​ចំនួន​ករណី​ឆ្លង ការសង្គ្រោះ​ជីវិត និង​ការវិលត្រឡប់​ទៅរក​ជីវភាព​ធម្មតា​តាមបែប គន្លង​ថ្មី​មួយ»។

លោកស្រី​វេជ្ជបណ្ឌិត Li Ailan
លោកស្រី​វេជ្ជបណ្ឌិត Li Ailan

ក្នុងនោះលោកស្រី​វេជ្ជបណ្ឌិត លី អែ​ឡែ​ន តំណាង​អង្គការ​សុខភាព​ពិភពលោក​ប្រចាំ​កម្ពុជា បានឱ្យដឹង​តាមរយៈ​សេចក្តី​ប្រកាស​ព័ត៌មាន​នេះ​ថា ៖ «យើង​ត្រូវធ្វើអ្វីៗទាំងអស់​ ដែល​យើង​អាចធ្វើ​ទៅបាន ដើម្បី​ការពារ​ការរីក​រាលដាល​នៃ​មេរោគ និង​ផលប៉ះពាល់​យ៉ាងធ្ងន់ធ្ងរ​ ដល់​សុខភាព សង្គម និង​សេដ្ឋកិច្ច»។ លោកស្រី​​បញ្ជាក់​ថា វា​ចាំបាច់​ណាស់​ ក្នុងការ​ស្វែងរក​មធ្យោបាយ​ ដែលមាន​ប្រសិទ្ធភាព​ជាង​មុន ដើម្បី​ធានា​ការអនុវត្ត និង​គោរព​តាម​វិធានការ សុខភាព​សាធារណៈ និង​សង្គម ជាពិសេស​តាមរយៈ​ការចូលរួម​ឱ្យ​បាន​ច្រើនជាង​មុន​របស់ សហគមន៍គ្រប់គ្នាជាពិសេសប្រជាពលរដ្ឋ។

លោកស្រី​វេជ្ជបណ្ឌិត Li Ailan មានប្រសាសន៍ថា ខណៈពេលដែល​រដ្ឋាភិបាល​បានធ្វើការ មិន​ខ្លាច​នឿយហត់ និង​ទាំងយប់​ទាំង​ថ្ងៃ​ ដើម្បី​បញ្ឈប់​ការរីក​រាលដាល​នៃ​វីរុស ដើម្បី​ជួយសង្គ្រោះ ជីវិត និង​ការពារ​សុខភាព លទ្ធផល​នៃ​ការស្ទង់មតិ​រៀបចំ​ដោយ​អង្គការ​សុខភាព​ពិភពលោក​ កាលពី ខែឧសភា ឆ្នាំ២០២១ថ្មីៗនេះ ដើម្បី​ស្វែងយល់​អំពី​អាកប្បកិរិយា និង​ការយល់ឃើញ​អំពី​ជំងឺ កូ​វីដ១៩ បាន​រកឃើញថា​ សហគម​ន៍​នៅ​កម្ពុជា​ មាន​ភាព​នឿយណាយ និង​យល់ឃើញថា ស្ថានភាព​មាន​ហានិភ័យមាន​​កម្រិត​ទាប។

លោក​ស្រី​មាន​ប្រសាសន៍​ថា៖«លទ្ធផល​រកឃើញ​ទាំងនេះ ធ្វើ​ឲ្យ​ខ្ញុំ​ព្រួយបារម្ភ។ ខ្ញុំ​យល់ ច្បាស់​ថា​ ប្រជាពលរដ្ឋ​យើង​មានការ​ធុញទ្រាន់ បន្ទាប់ពី​ការប្រយុទ្ធ​ប្រឆាំងនឹង​វីរុស​អស់​រយៈពេល ១៨ខែ​មក ប៉ុន្តែ​យើង​គ្មាន​ជម្រើស​ផ្សេងទៀត​ទេ។ យើង​ត្រូវតែ​បង្កើន​កិច្ចខិតខំ​ប្រឹងប្រែង​រប​ស់​យើង ដើម្បី​បញ្ឈប់​ការរីក​រាលដាល​នៃ​ជំងឺ​កូ​វីដ១៩។ ប្រជាពលរដ្ឋ​គ្រប់រូប មាន​តួនាទី​សំខាន់​ណាស់»។