ក្រុមការងាររៀបចំចាត់ចែងឈាបនដ្ឋានបូជាសពអ្នកដែលស្លាប់ដោយជំងឺកូវីដខេត្តកោះកុង បង្ហាញថា អ្នកស្លាប់ដោយសារជំងឺកូវីដ១៩មានចំនួន៥នាក់ហើយនៅក្នុងមូលដ្ឋានខេត្តកោះកុង បើគិតចាប់ពីថ្ងៃទី១០ មិថុនា មកទល់ម៉ោងនេះ។
លោក អ៊ូច ទូច ប្រធានមន្ទីរធម្មការ និងសាសនាខេត្ត និងជាអនុប្រធានអចិន្រៃ្តយ៍ក្រុមការងាររៀបចំចាត់ចែងឈាបនដ្ឋានបូជាសពអ្នកដែលស្លាប់ដោយជំងឺកូវីដខេត្តកោះកុង ឱ្យដឹងនៅថ្ងៃថា គិតត្រឹមថ្ងៃទី២៩ មិថុនានេះ ខេត្តកោះកុង មានអ្នកស្លាប់ដោយសារជំងឺកូវីដ១៩ចំនួន៥នាក់ហើយនៅមន្ទីរពេទ្យខេត្ត និងមន្ទីរពេទ្យស្រុកស្រែអំបិល។
លោក អ៊ូច ទូច បន្ថែមថា ជាក់ស្តែងកាលពីថ្ងៃទី២៩ មិថុនា មានស្រ្តីវ័យ៧៦ឆ្នាំស្លាប់នៅមន្ទីរពេទ្យបង្អែកស្រុកស្រែអំបិលវេលាម៉ោង១រំលងអធ្រាត្រថ្ងៃទី២៩ មិថុនា ២០២១ និងទី២ បុរស អាយុ២៣ ឆ្នាំ ស្លាប់នៅមន្ទីរពេទ្យបង្អែកខេត្តកោះកុង វេលាម៉ោង ១៧:២០នាទី ថ្ងៃទី២៨ មិថុនា។
បើតាមលោកប្រធានមន្ទីរធម្មការខេត្ត រម្លឹកដែរថា ទី៣-បុរសអាយុ៦៤ឆ្នាំ ស្លាប់ថ្ងៃទី១០/មិថុនា/២០២១ នៅមន្ទីរពេទ្យខេត្ត ទី៤- បុរសអាយុ ៧១ឆ្នាំ ស្លាប់ថ្ងៃទី២៣/មិថិនា/២០២១ នៅមន្ទីរពេទ្យបង្អែកស្រែអំបិល និងទី៥-ស្ត្រី អាយុ៦០ ឆ្នាំ ស្លាប់ថ្ងៃទី២៤/មិថុនា/២០២១ នៅមន្ទីរពេទ្យខេត្ត។
បច្ចុប្បន្នក្រុមការងារបានសម្របសម្រួលពិធីបូជាសព ស្លាប់ដោយជំងែកូវីដតាមប្រពៃណីជាតិខ្មែររួចរាល់នៅឈាបនដ្ឋានវត្តអារាមជាបណ្តុះអាសន្ន ខណៈទីតាំងបូជាសពអ្នកស្លាប់កូវីឌនៅមិនទាន់ចេញជារូបរាងនៅឡើយ។ តែអាជ្ញាធរអះអាងថា ក្រុមការងារបានខិតខំរកទីតាំងដើម្បីស្ថាបនាតម្រូវការអំឡុងកូវីដ។
អាជ្ញាធរខេត្តស្រុកមន្ទីរជំនាញ កន្លងទៅធ្លាប់ពិនិត្យមើលទីតាំងក្នុងដីបម្រុងទុករបស់រដ្ឋ សម្រាប់សាងសង់ឈាបនដ្ឋាននេះតាមបណ្តោយផ្លូវជាតិលេខ៤៨ ស្ថិតនៅក្នុងឃុំទួលគគីរ ស្រុកមណ្ឌលសីមា ផ្តើមចេញពីផ្លូវជាតិឆ្ពោះទៅទីតាំងមានប្រវែង១០០ម៉ែត្រ ទទឹង៨ម៉ែត្រ និង៥០ម៉ែត្របួនជ្រុង។ ដោយសារអាកាសធាតុភ្លៀងខ្លាំងជាប់ៗទើបមិនពុំអាចដាក់គ្រឿងចក្រអនុវត្តបានតាមផែនការ។
ទាក់ទិនអត្រាស្លាប់របស់អ្នកជំងឺកូវីដ លោក ទូ សាវុធ អភិបាលរងខេត្តកោះកុង តែងដាស់តឿនដល់ប្រជាពលរដ្ឋ ព្រមទាំងអ្នកពាក់ព័ន្ធទាំងអស់ចាំបាច់បន្តចូលរួមអនុវត្តសុខាភិបាល៣កុំ និង៣ការពារអោយបានខ្ជាប់ខ្ជួន។ តស៊ូលំបាករយៈពេលខ្លី ចៀសវាងលំបាករយៈពេលវែង ទោះបីជាទទួលបានវ៉ាក់សាំងបង្ការក៏ដោយ។
យោងតាមរបាយការណ៍ទិន្នន័យរបស់មន្ទីរសុខាភិបាលខេត្តកោះកុង កាលពីថ្ងៃទី២៤ ខែមិថុនា ថ្មីៗ ឱ្យដឹងថា ខេត្តកោះកុងមានអ្នកជំងឺកូវីឌ១៩សរុប១.៥៩៧នាក់ ស្រ្តី១.០៦៨ ស្លាប់៣នាក់ និងកំពុងព្យាបាល១.៤១៧នាក់/ស្រ្តី៩៧៤នាក់៕
ប្រភព៖ក្រសួងព័ត៌មាន
