សៀមរាប៖ ក្រុមគ្រូពេទ្យ បានប្រមូលសំណាកពីក្រុមអាជីវករ និងប្រជាពលរដ្ឋជាង ១ពាន់នាក់ នៅផ្សារដំដែក ស្រុកសូទ្រនិគម ខេត្ដសៀមរាប ដើម្បីរកមេរោគកូវីដ-១៩។ ខណ:ដែលជំងឺកូវីដ-១៩ កំពុងរីករាលដាលមានការកើនឡើងជារៀងរាល់ថ្ងៃ ក្រុមអាជីវករ និងប្រជាពលរដ្ឋ ព្រួយបារម្ភបាននាំគ្នាផ្ដល់សំណាកធ្វើតេស្ដរកមេរោគកូវីដ-១៩ នៅវិទ្យាល័យដំដែក ដោយពួកគាត់មានការសង្ស័យឆ្លងមេរោគកូវីដ-១៩ ពីអ្នកលក់នំនៅក្នុងសផ្សារដំដែកនោះ។
លោក ម៉ក់ ប្រុស អភិបាលស្រុកសូទ្រនិគម មានប្រសាសន៍នៅថ្ងៃទី០៥ ខែកក្កដា ឆ្នាំ២០២១នេះថា ការធ្វើតេស្ដទៅលើអាជីវករនៅផ្សារដំដែកនោះ បានធ្វើឡើងចាប់ពីថ្ងៃទី០៣ ខែកក្កដានេះ បន្ទាប់ពីអាជ្ញាធរបានរកឃើញអ្នកឆ្លងកូវីដ-១៩ ជាអ្នកលក់នំនៅខាងក្រោយផ្សារចូលទៅក្នុងផ្សារ និងអ្នកដឹកទំនិញចេញពីផ្សារកំពង់ក្ដី ស្រុកជីក្រែង។ ដូចនេះអាជ្ញាធរត្រូវធ្វើការបិទផ្សារជាបណ្ដោះអាសន្នជៀសវាងការឆ្លងរីករាលដាលជំងឺកូវីដ-១៩ នេះកាន់តែធំ ។លោកបានបន្ដថា ការបិទផ្សារជាបណ្ដោះអាសន្ននេះចំនួន ២សប្ដាហ៍ ចាប់ពីថ្ងៃទី០២ ដល់ថ្ងៃទី១៥ ខែកក្កដានេះ ដើម្បីទប់ស្កាត់ការរីករាលដាលជំងឺកូវីដ-១៩កាន់តែច្រើនចូលក្នុងសហគមន៍បន្ថែមទៀត។ លោកបញ្ជាក់ថា មកដល់ពេលនេះការធ្វើតេស្ដរកមេរោគកូវីដ-១៩ មានជាង១ពាន់នាក់ និងមានវិជ្ជមានកូវីដ-១៩ប្រមាណ៤០នាក់។
លោកបានបន្ថែមថា អាជ្ញាធរមិនត្រឹមតែបិទផ្សារដំដែកនេះទេ គឺមានបិទផ្សារថ្នល់ចែក និងភូមិលំនៅឋានប្រជាពលរដ្ឋខ្លះបន្ដែមទៀតផងដែរ។ លោកថា ការធ្វើបែបនេះ ដើម្បីងាយស្រួលគ្រប់គ្រង នៃអ្នកវិជ្ជមានកូវីដ-១៩។ តូបលក់ដូរអាជីវករ នៅផ្សារដំដែកនេះមានតូបលក់ដូរប្រមាណជាង៥០០តូបទាំង តូបតូច ទាំងតូបធំ។
លោក ម៉ក់ ប្រុស បានបន្ថែមឱ្យដឹងទៀតថា នៅក្នុងព្រឹត្ដិការណ៍សហគមន៍២០កុម្ភ: សម្រាប់ស្រុកសូទ្រនិគម គិតត្រឹមថ្ងៃទី០៤ ខែកក្កដានេះ មានចំនួនអ្នកធ្វើតេស្ដរកមេរោគកូវីដ-១៩ចំនួនសរុប២,៨៥៥នាក់ ក្នុងនោះរកឃើញវិជ្ជមានចំនួន១៥០នាក់ហើយ ខណ:ទូទាំងខេត្តសៀមរាប គិតត្រឹមថ្ងៃទី០៤ ខែកក្កដា ឆ្នាំ២០២១នេះ មានអ្នកវិជ្ជមានជំងឺកូវីដ-១៩ ចំនួន ១,៥០៨នាក់, បានព្យាបាលជាសះស្បើយចំនួន ៥៨០នាក់, ស្លាប់១៧នាក់ និង៩១១នាក់ កំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប, មណ្ឌលចត្តាឡីស័កគរុកោសល្យ និងវិក្រឹតការខេត្ត និងវិទ្យាល័យដំដែក៕
ប្រភព៖ ក្រសួងព័ត៌មាន
