មន្ត្រីក្រសួងការបរទេសកូរ៉េខាងត្បូងបាននិយាយកាលពីថ្ងៃច័ន្ទថា ជនជាតិកូរ៉េខាងត្បូងទាំងអស់ដែលនៅសេសសល់នៅក្នុងប្រទេសអាហ្វហ្គានីស្ថាន ត្រូវតែចាកចេញពីប្រទេសនោះមិនឱ្យហួសពីខែកក្កដាឡើយ បើពុំនោះទេនឹងប្រឈមមុខនឹងការដាក់ទណ្ឌកម្ម ដោយសារភាពចលាចលមានការកើនឡើងនៅក្នុងប្រទេសអាហ្វហ្គានីស្ថាន ចំពេលដែលមានការបន្តដកទ័ពរបស់សហរដ្ឋអាមេរិក និងកងកម្លាំងសម្ព័ន្ធមិត្តរបស់ខ្លួនចេញពីប្រទេសនោះ។
បច្ចុប្បន្ននេះ ប្រទេសអាហ្វហ្គានីស្ថានត្រូវបានហាមឃាត់មិនឱ្យធ្វើដំណើរជាមួយប្រទេសបរទេសចំនួន ៥ ផ្សេងទៀត ដែលរួមមានទាំងអ៊ីរ៉ាក់ ស៊ីរី និងសូម៉ាលីផងដែរ។ ការរំលោភទៅលើការហាមឃាត់នៃការធ្វើដំណើរនេះ នឹងត្រូវផ្តន្ទាទោសឱ្យជាប់ពន្ធនាគាររយៈពេលមួយឆ្នាំ ឬពិន័យជាប្រាក់ចំនួន ១០លានវ៉ុន (ស្មើនឹង ៨ ៨៣៧ដុល្លារអាម៉េរិក) នៃច្បាប់របស់ប្រទេសកូរ៉េខាងត្បូង។
មន្រ្តីក្រសួងការបរទេសនោះបាននិយាយថា ប្រជាជនកូរ៉េខាងត្បូងមួយចំនួនតូចនៅតែស្ថិតក្នុងប្រទេសនេះ បើទោះបីជាមានការស្នើសុំម្តងហើយម្តងទៀតពីរដ្ឋាភិបាលឱ្យចាកចេញក៏ដោយ។ ក្រសួងនេះបានបដិសេធមិនផ្តល់ព័ត៌មានលម្អិតថា តើមានប្រជាជនប៉ុន្មាននាក់កំពុងស្នាក់នៅក្នុងប្រទេសនោះដោយសារតែក្តីបារម្ភពីសុវត្ថិភាពនោះទេ។
យោងតាមមន្រ្តីរូបនោះបានឱ្យដឹងថា គណៈប្រតិភូរដ្ឋាភិបាលដែលដឹកនាំដោយមន្រ្តីជាន់ខ្ពស់នៃក្រសួងការបរទេសមកពីទីក្រុងសេអ៊ូល បានធ្វើទស្សនកិច្ចនៅទីក្រុងកាប៊ុលកាលពីសប្តាហ៍មុនដើម្បីជួប និងបញ្ចុះបញ្ចូលប្រជាជនទាំងនោះឱ្យចាកចេញភ្លាមៗតាមដែលអាចធ្វើទៅបាន។
មន្ត្រីរូបនោះបាននិយាយថា «បើទោះបីជាមានការស្នើសុំរបស់យើងក៏ដោយ ក៏មានពលរដ្ឋរបស់យើងមួយចំនួនតូចនៅតែស្ថិតនៅក្នុងប្រទេសនោះដោយសារតែហេតុផលផ្ទាល់ខ្លួន ហើយយើងមានគម្រោងចាត់វិធានការចាំបាច់នានាដើម្បីជួយជម្លៀសពួកគេឱ្យបានឆាប់តាមដែលពួកគេអាចធ្វើបាន»។
មន្ត្រីដដែលនោះបាននិយាយបន្ថែមថា រដ្ឋាភិបាលអាចដាក់ពាក្យបណ្តឹងព្រហ្មទណ្ឌប្រឆាំងនឹងអ្នកដែលនៅតែស្ថិតនៅក្នុងប្រទេសនោះ។
ភាពតានតឹងកំពុងមានការកើនឡើងនៅក្នុងប្រទេសមួយនេះ ដែលមានការហែកហួរដោយសង្គ្រាមដោយសារក្រុមឧទ្ទាមតាលីបង់កំពុងកាន់កាប់ទឹកដីបន្ថែមទៀតចាប់តាំងពីសហរដ្ឋអាមេរិក និងសម្ព័ន្ធមិត្តអង្គការណាតូរបស់ខ្លួនបានចាប់ផ្តើមដកទ័ពកាលពីខែឧសភា៕
ប្រភព៖ក្រសួងព័ត៌មាន
