យោងតាមការសិក្សាថ្មីមួយដោយប្រើរូបភាពផ្កាយរណបបានបង្ហាញថា ផ្ទៃដីដ៏ធំសម្បើមបានខិតជិតដល់កម្រិតទឹកសមុទ្រទូទាំងតំបន់អាស៊ីអាគ្នេយ៍ ដូចអ្វីដែលបានព្យាករណ៍ទុកជាមុនដែលបង្ហាញពីគ្រោះថ្នាក់ទឹកជំនន់ដែលនឹងប៉ះពាល់ដល់ប្រជាជនរាប់លាននាក់ ។ នេះបើយោងតាមការចេញផ្សាយ របស់សារព័ត៌មាន CNA នៅព្រឹកថ្ងៃពុធ ទី០៧ កក្កដា នេះ ។
នៅតាមបណ្តាប្រទេសដែលងាយរងគ្រោះ នៃការកើនឡើងកម្ពស់ទឹកសមុទ្រ និងងាយនឹងជន់លិច ដោយសារទឹកជំនន់ ដូចជាឥណ្ឌូនេស៊ី ថៃ វៀតណាម និង ហ្វីលីពីន ជាដើម គឺមានន័យថា ប្រជាជនកាន់តែច្រើននឹងប្រឈមមុខនឹងព្រឹត្តិការណ៍កម្រិតទឹកសមុទ្រប្រចាំឆ្នាំដែលកាន់តែអាក្រក់ទៅៗ ដោយសារតែ បំរ៉ែបំរួលអាកាសធាតុ។
ការវាយតម្លៃនិងការប៉ាន់ស្មានហានិភ័យទឹកជំនន់នៅតាមឆ្នេរសមុទ្រកន្លងមកត្រូវបានកាត់បន្ថយដោយកង្វះភាពត្រឹមត្រូវនៅក្នុងទិន្នន័យរ៉ាដារផ្កាយរណបដែលវាស់កម្រិតកម្ពស់ដី។
ទោះយ៉ាងណាអ្នកស្រាវជ្រាវមកពីវិទ្យាស្ថានស្រាវជ្រាវដែលមានមូលដ្ឋាននៅហូឡង់អាចអនុវត្តគំរូលើកដំបូងជាសកលដោយប្រើប្រាស់ទិន្នន័យពន្លឺរណប និងការរាវរកផ្កាយរណប (LiDAR) ដែលផ្តល់នូវរូបភាពត្រឹមត្រូវជាងមុន។
ក្រុមអ្នកស្រាវជ្រាវបានសង្កត់ធ្ងន់ថាតួលេខទាំងនេះអាចខុសគ្នានៅថ្នាក់មូលដ្ឋាន ដែលទិន្នន័យច្បាស់លាស់អាចជួយមន្ត្រីរៀបចំផែនការកាត់បន្ថយហានិភ័យទឹកជំនន់។
ក្រុមអ្នកស្រាវជ្រាវបានរកឃើញថា បន្ទុកនៃហានិភ័យទឹកជំនន់នៅតាមឆ្នេរសមុទ្រនាពេលបច្ចុប្បន្ននិងការកើនឡើងនៃកម្ពស់ទឹកសមុទ្រនាពេលអនាគតធ្លាក់ចុះយ៉ាងច្រើនលើតំបន់ត្រូពិកជាពិសេសនៅក្នុងតំបន់អាស៊ី។
ការសិក្សាបានប៉ាន់ប្រមាណថាប្រជាជនចំនួន ១៥៧ លាននាក់ នៅអាស៊ីត្រូពិកបច្ចុប្បន្នរស់នៅក្នុងតំបន់ក្រោម ២ ម៉ែត្រពីលើនីវ៉ូទឹកសមុទ្រ ជាជួរដែលផលប៉ះពាល់ត្រូវបានគេព្យាករណ៍ថាធ្ងន់ធ្ងរ។ ចំនួននេះនឹងកើនឡើងគួរអោយកត់សំគាល់ប្រសិនបើកំពស់ទឹកសមុទ្រកើនឡើងក្នុងប៉ុន្មានទស្សវត្សខាងមុខនេះដូចដែលពួកគេបានព្យាករណ៍។
ក្រុមអន្តររដ្ឋាភិបាលសម្រាប់ការផ្លាស់ប្តូរអាកាសធាតុរំពឹងថា កម្ពស់ទឹកសមុទ្រនឹងកើនឡើងដល់ ០,៨ ម៉ែត្រអាចនឹងកើតឡើងនៅឆ្នាំ ២១០០ និងព្រឹត្តិការណ៍ទឹកជំនន់ខ្លាំងដែលធ្លាប់កើតឡើងម្តងក្នុងរយៈពេល ១០០ ឆ្នាំអាចកើតឡើងជារៀងរាល់ឆ្នាំនៅចុងសតវត្សរ៍នេះ។
