លោកស្រី ស៊ុម សារី ម្តាយរបស់សកម្មជនក្រុមប្រឆាំងម្នាក់ ដែលប្រមាថអាយុជីវិតសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា នៅថ្ងៃ១២រោច ខែបឋមាសាឍ ឆ្នាំឆ្លូវ ត្រីស័ក ព.ស. ២៥៦៥ត្រូវនឹងថ្ងៃអង្គារ ទី០៦ ខែកក្កដា ឆ្នាំ២០២១ បានចេញមុខសុំអភ័យទោសសម្តេចតេជោ ហ៊ុន សែន ជាសាធារណៈជំនួសកូនស្រីរបស់ខ្លួន។
ក្នុងវីដេអូ សុំអភ័យទោសនេះ លោកស្រី ស៊ុម សារី ដែលជាម្តាយរបស់ស្រ្តីឈ្មោះ ហេង មុំ ហៅអ្នកគ្រូបាល្លី ជាសកម្មជនក្រុមប្រឆាំងនៅក្រៅប្រទេស បានអះអាងថា កូនស្រីរបស់លោកស្រី មិនសូវជាដឹងខុសត្រូវនោះទេ។
លោកស្រីបានពន្យល់ទៅកាន់កូនស្រីថា ការរស់រានមានជីវិតរបស់នាងសព្វថ្ងៃនេះ ក៏ដោយសារតែគុណសម្តេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា ដែលបានរំដោះប្រទេសឱ្យរួចផុតពីរបបប្រល័យពូជសាសន៍ប៉ុលពតផងដែរ។
លោកស្រីបានរម្លឹកអំពីគុណបំណាច់របស់សម្តេចតេជោ ហ៊ុន សែន ចំពោះជាតិមាតុភូមិ ដែលនាំមកនូវភាពសុខសន្តិភាពដល់សព្វថ្ងៃ។
ជាមួយនឹងការសុំអភ័យទោស និងចេញមុខការពារសម្តេចតេជោ ហ៊ុន សែន ចំពោះការប្រមាថរបស់កូនខ្លួននោះ លោកស្រីក៏បានជូនពរសម្តេចតេជោ ហ៊ុន សែន ឱ្យជួបប្រទះតែក្តីសុខ ហើយបន្តដឹកនាំប្រទេសកម្ពុជាឆ្ពោះ ទៅរកភាពរុងរឿងបន្តទៀត ៕
ប្រភព៖ក្រសួងព័ត៌មាន
