កីឡាករប្រណាំងរទេះពិការ វ៉ាន វ៉ុន មិនឈ្នះមេដាយទេ ប៉ុន្តែបំបែកកំណត់ត្រាខ្លួនឯង២ដងក្នុងថ្ងៃតែមួយ

41

កីឡាករជនពិការកម្ពុជា វ៉ាន វ៉ុន មិនអាចប្រជែងបានមេដាយឡើយ ដោយឈរលេខ៧ នៅក្នុងការប្រកួតវគ្គផ្តាច់ព្រ័ត្រ ព្រឹត្តិការណ៍ ប៉ារ៉ាឡាំពិក ទីក្រុងតូក្យូ ប្រទេសជប៉ុន កាលពីល្ងាចថ្ងៃ៩រោច ខែស្រាពណ៍ ឆ្នាំឆ្លូវ ត្រីស័ក ព.ស. ២៥៦៥ ត្រូវនឹងថ្ងៃពុធ ទី០១ ខែកញ្ញា ឆ្នាំ២០២១។

ទោះជាមិនអាចប្រជែងបានមេដាយជូនជាតិក៏ពិតមែន ប៉ុន្តែកីឡាករពិការ វ៉ាន វ៉ុន បានប្រឹងប្រែងអស់ពីសមត្ថភាព ដោយបានបំបែកកំណត់ត្រាខ្លួនឯងបានយ៉ាងល្អ២ដង លើវិញ្ញាសាប្រណាំរទេះ T54 ១០០ម៉ែត្រ ក្នុងថិរវេលា ១៤.២១វិនាទី នៅវគ្គផ្តាច់ព្រ័ត្រ ហើយកាលពីវគ្គជម្រុះនៅព្រឹកថ្ងៃទី០១ ខែកញ្ញា ដដែល វ៉ាន វ៉ុន ធ្វើសម្រេចក្នុងថិរវេលា ១៤.៣៩វិនាទី ដោយដណ្តើមបានចំណាត់ថ្នាក់លេខ២ ក្នុងស៊េរី ហើយបានឡើងមកដល់វគ្គផ្តាច់ព្រ័ត្រនេះ។ សមិទ្ធផលថ្មី២លើកចុងក្រោយរបស់កីឡាករជម្រើសជាតិពិការកម្ពុជារូបនេះ បានធ្វើឱ្យមហាជនបង្ហាញការគាំទ្រ ចំពោះការខិតខំប្រកួតនៅក្នុងព្រឹត្តិការណ៍កីឡាជនពិការកម្រិតខ្ពស់បំផុតរបស់ពិភពលោក រៀងរាល់៤ឆ្នាំម្តងនេះ។

សិទ្ធផលទាំងពីរលើក ក្នុងប៉ារ៉ាឡាំពិក ទីក្រុងតូក្យូ ប្រទេសជប៉ុន ឆ្នាំ២០២០ (ពន្យារពេល)នេះ គឺជាការបំបែកកំណត់ត្រាចាស់២លើកកន្លងទៅដែរ គឺព្រឹត្តិការណ៍ប៉ារ៉ាឡាំពិក នៅទីក្រុងរីយ៉ូ កាលពីឆ្នាំ២០១៦ វ៉ាន វ៉ុន បានប្រើថិរវេលា ១៥.០២វិនាទី ក៏ដូចជាការប្រកួតជើង ឯកពិភពលោក នៅទីក្រុងឌូបៃ ប្រើថិរវេលា ១៤.៥៧វិនាទី។

ចំពោះលទ្ធផលវិញ្ញាសានៅវគ្គផ្តាច់ព្រ័ត្រនេះ មាន៨ប្រទេសចូលរួម ដោយលេខ១ បានទៅលើកីឡាករថៃ Athiwat Paeng-Nuea ធ្វើសម្រេចក្នុងថិរវេលា ១៣.៧៦, លេខ២ កីឡាករហ្វាំងឡង់ ១៣.៨៥ និងលេខ៣ កីឡាករម៉ិកស៊ិក ១៣.៨៧ ខណៈកីឡាករ វ៉ាន វ៉ុន របស់កម្ពុជា ឈរនៅលេខ៧ លើប្រទេសហូឡង់។

ឯកឧត្តម យី វាសនា អគ្គលេខាធិការ គណៈកម្មាធិការជាតិប៉ារ៉ាឡាំពិកកម្ពុជា បានស ម្តែងនូវក្តីរីករាយជាខ្លាំង ដែលជម្រើសជាតិពិការ វ៉ាន វ៉ុន បានឈរជើងនៅចំណាត់ថ្នាក់លេខ៧ពិភពលោក លើប្រភេទវិញ្ញាសាប្រណាំរទេះ T54 ១០០ម៉ែត្រនេះ។

សូមបញ្ជាក់ថា គណៈកម្មាធិការជាតិប៉ារ៉ាឡាំពិកកម្ពុជា បានបញ្ជូនកីឡាករម្នាក់ និងនាយបេសកកម្មម្នាក់ គឺលោក យី សុភ័ក្ត្រា នៅក្នុងព្រឹត្តិការណ៍កីឡាប៉ារ៉ាឡាំពិក នៅជប៉ុននេះ ដោយទទួលបានការឧបត្ថម្ភទាំងស្រុងពីប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន ប្រធានគណៈកម្មាធិការជាតិប៉ារ៉ាឡាំពិកកម្ពុជា ៕

ប្រភព៖ ក្រសួងព័ត៌មាន