គ្មានអ្នកណាម្នាក់អាចមានអាយុ ២០ ឆ្នាំ ឬ ៣០ឆ្នាំ ពីរដងនោះឡើយ ក្នុងមួយឆាកជីវិតរបស់មនុស្ស តែអ្វីដែលសំខាន់ត្រង់ថា តើបានធ្វើអ្វីខ្លះសម្រាប់ខ្លួនឯងនៅក្នុងវ័យនេះ? មនុស្សមួយចំនួនបានឆ្លងកាត់វ័យនេះទាំងមិនដឹងខ្លួន ខណៈមនុស្សមួយចំនួនទៀតបានត្រៀមខ្លួនយ៉ាងល្អខិតខំក្រេបយក ចំណេះដឹង និងបទពិសោធន៍ល្អៗធ្វើឲ្យពួកគេទទួលបានផ្លែផ្កាត្រចះត្រចង់នៅ មជ្ឈិមវ័យ។
ឥឡូវនេះ សម្រាប់ប្រិយមិត្ត ជាពិសេសលោកអ្នកដែលមានអាយុក្រោម ៣០ឆ្នាំ ដែលចង់ឲ្យជីវិតរបស់ខ្លួនមានគុណភាព និងរស់រវើកជានិច្ច គួរស្វែងយល់ចាប់យកនៅប៉ុន្មានចំណុចខាងក្រោមនេះ មកអនុវត្តវិញឲ្យបានឆាប់រហ័សបំផុត ដើម្បីជៀសវាងភាពស្តាយក្រោយដោយប្រការណាមួយ។
១. ផ្ដោតយកចិត្តទុកដាក់ «ភាពស្ងប់ស្ងៀម គឺជាពេលវេលាដ៏សមគួរសម្រាប់អ្នកដើម្បីផ្ដោតយកចិត្តទុកដាក់លើផែនការអ្វីមួយ»។ លោក Stephen Richards អ្នកនិពន្ធសៀវភៅអង់គ្លេស។
ការផ្ដោតយកចិត្តទុកដាក់ គឺជាគុណសម្បត្តិមួយដែលមនុស្សគ្រប់រូប ជាពិសេសយុវជនត្រូវមានសម្រាប់បណ្ដុះប្រាជ្ញាស្មារតី និងដាស់តឿនខ្លួនឯងប្រមូលផ្តុំធនធានផ្សេងៗសម្រាប់បាញ់ឆ្ពោះទៅរក គោលដៅដែលបានកំណត់។ ការស្ងប់ស្ងៀម គឺជាផ្លូវដែលល្អប្រសើរដើម្បីផ្ដោតយកចិត្តទុកដាក់ទៅ អ្វីដែលអ្នកចង់បាន ហើយត្រូវធ្វើជានិច្ច មិនថានៅកាលៈទេសៈណានោះទេ ព្រោះថាការយកចិត្តទុកដាក់កាន់តែច្រើន ភាគរយនៃភាពជោគជ័យលើសកម្មភាពមួយក៏មានច្រើនទៅតាមនោះដែរ។
២. ទេពកោសល្យ «មនុស្សគ្រប់គ្នាមានទេពកោសល្យ។ មនុស្សដែលចេះប្រើទេពកោសល្យរបស់ខ្លួន នឹងអាចហែលផុតពីភាពខ្មៅងងិតបានយ៉ាងងាយស្រួល»។ អ្នកស្រី Erica Jong អ្នកនិពន្ធសៀវភៅប្រលោមលោករបស់អាមេរិក។ ទេពកោសល្យពិតជាមានសារសំខាន់ណាស់ សម្រាប់មនុស្សគ្រប់រូប។ បុគ្គលណាក៏ដោយ ដែលប្រើប្រាស់ទេពកោសល្យរបស់ខ្លួនបានកាន់តែច្រើន គឺកាន់តែមានទំនុកចិត្ត និងកាន់តែជោគជ័យ។ មនុស្សម្នាក់ៗ មិនត្រូវមើលរំលងចំណុចនេះឡើយ ព្រោះថា អ្នកដែលចេះប្រើទេពកោសល្យរបស់ខ្លួនបាន គឺជាអ្នកដែលដឹងពីភាពខ្លាំង និង ភាពខ្សោយខ្លួនឯង។
៣. ការអត់ធ្មត់ «ធ្វើខ្លួនឲ្យដូចទឹកទន្លេតែទឹកហូរយឺតៗ និងទៅមុខជានិច្ច»។ លោក A.A. Milne អ្នកនិពន្ធសៀវភៅរបស់អង់គ្លេស។ការអត់ធ្មត់គឺជាកាយវិការមួយក្នុងការរង់ចាំ ឬ ការបើកចិត្តទទួលយកស្ថានការណ៍មួយយ៉ាងចំហដោយមិនចេះតក់ក្រហល់។ មនុស្សដែលមានការអត់ធ្មត់ខ្ពស់ គឺជាមនុស្សដែលមានភាពជឿជាក់ ឲ្យតម្លៃលើតថភាព (ភាពពិត) ដែលនឹងអាចទទួលបានសមិទ្ធផលជាវិជ្ជមានទោះក្នុងស្ថានការណ៍ណា ក៏ដោយ។ បើលោកអ្នកមិនមានការអត់ធ្មត់ខ្ពស់ គួររៀនសូត្រចំណុចនេះឲ្យបានច្រើនភ្លាមទៅ ព្រោះថា វាជាដំណើរនាំមកនូវសន្តិភាពផ្លូវចិត្ត និង ផ្លូវកាយសម្រាប់ខ្លួនឯង និង អ្នកដទៃ។
៤. ភាពវិជ្ជមាន «ទោះជាដុំពពកនាំភ្លៀង ឬ ខ្យល់ព្យុះមកជាមួយ យ៉ាងហោចណាស់វាក៏បានជួយបន្ថែមពណ៌ឲ្យផ្ទៃមេឃដែរ»។ លោក Rabindranath Tagore អ្នកអក្សរសាស្ត្រនិយមមកពីតំបន់បេងហ្គាល់ (Bengal)
អរគុណដល់លោក Tagore ដែលបានផ្តល់ដំបូន្មាននេះ ព្រោះថាបើយោងតាមស្ថានភាពជាក់ស្តែង មនុស្សមួយចំនួនបានគិតអវិជ្ជមានចំពោះខ្លួនឯងដែរ។ ដូច្នេះហើយ វាគួរតែមានអ្វីម្យ៉ាងសម្រាប់ឲ្យមនុស្សប្រភេទនេះស្វែងយល់ហើយ។ យុវជនដែលជាទំពាំងស្នងឫស្សី គួរណាស់តែមានគំនិតសុទិដ្ឋិនិយមចំពោះខ្លួនឯង និង អ្វីៗដែលមាននៅជុំវិញខ្លួន។ បញ្ហា គឺជារឿងធម្មតាសម្រាប់មនុស្ស តែអ្វីដែលសំខាន់ត្រូវមានគំនិតវិជ្ជមាន ផ្ដោតលើដំណោះស្រាយជាសំខាន់ ទើបអ្នកអាចគេចផុតពីក្រញាំទុក្ខព្រួយបាន។
