មណ្ឌលគិរី៖ ឯកឧត្តម ថង សាវុន អភិបាលខេត្តមណ្ឌលគិរីបានណែនាំដល់មន្ត្រីជំនាញ និងអ្នកពាក់ព័ន្ធទាំងអស់ត្រូវបង្កើនសកម្មភាព ផ្សព្វផ្សាយ លើកទឹកចិត្តបណ្តុះបណ្តាលបង្រៀនបច្ចេកទេស ដល់ប្រជាកសិករ ដើម្បីជំរុញឱ្យមានការដាំដុះដំណាំបន្លែធម្មជាតិសម្រាប់ផ្គត់ផ្គង់ដល់តម្រូវការប្រចាំថ្ងៃរបស់ប្រជាពលរដ្ឋ និងអាចឈានដល់ការនាំចេញទៅក្រៅប្រទេស។

ថ្លែងក្នុងពិធីប្រមូលផលដំណាំដំឡូងបារាំងរបស់កសិករគ្រី ម៉េងឃាង ស្ថិតនៅភូមិចម្ការតែ សង្កាត់ស្ពានមានជ័យ ក្រុងសែនមនោរម្យ កាលពីរសៀលថ្ងៃទី២៤ ខែមករា ឆ្នាំ២០២២ អភិបាលខេត្តមណ្ឌលគិរី មានប្រសាសន៍ថា មន្ត្រីត្រូវយកចិត្តទុកដាក់ជួយសម្រួលដល់កសិករ ក្នុងការផ្ដល់ពូជ ឬផ្នែកបច្ចេកទេស ដើម្បីប្រែក្លាយពីការធ្វើកសិកម្មគ្រួសារបែបប្រពៃណី ទៅជាកសិកម្មទំនើបដែលឈានដល់ការផ្គត់ផ្គង់ក្នុងខេត្ត ក្រៅខេត្ត និងបន្តការនាំចេញក្រៅប្រទេស។

ឯកឧត្តម ថង សាវុន បន្តថា ខេត្តមណ្ឌលគិរី នៅមានឱកាសជាច្រើន ដែលអំណោយផលជាងខេត្តដទៃ ជាពិសេស លើប្រភេទដំណាំបន្លែមួយចំនួន ដូចជា ស្ពៃក្តោប កាហ្វេ ប័រ ការ៉ុត ដំឡូងបារាំង។ ប្រភេទបន្លែទាំងនេះ បើមានការគ្រប់គ្រងជំនាញដាំដុះច្បាស់លាស់ ដាំស្របតាមគោលការណ៍ធម្មជាតិ វានឹងក្លាយជាដំណាំប្រចាំភូមិសាស្ត្ររបស់ខេត្ត ហើយអាចជួយផ្តល់ចំណូលដល់កសិករថែមមួយកម្រិតទៀត។

ជុំវិញការលក់ដូរបន្លែផ្លែឈើធម្មជាតិក្នុងខេត្តមណ្ឌលគិរី ឯកឧត្តម ថង សាវុន ក៏បានណែនាំដល់មន្ត្រីជំនាញនានា និងអាជ្ញាធរ ត្រូវអប់រំដល់បងប្អូនអាជីវករ មួយចំនួន ដែលសព្វថ្ងៃមានការនាំយកផលិតផលក្រៅខេត្ត ឬមកពីប្រទេសជិតខាង ត្រូវមានភាពស្មោះត្រង់ដល់អតិថិជន។ បន្លែផ្លែឈើនាំចូលត្រូវបញ្ជាក់ដល់អ្នកទិញឱ្យបានច្បាស់ចៀសវាងការយល់ច្រឡំលើផលិតផលរបស់ខេត្តមណ្ឌលគិរី ដែលកំពុងមានឈ្មោះល្បីល្បាញ ពីរសជាតិ និងគ្មានធាតុគីមី។

លោក សុង ឃាង ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត បានឱ្យដឹងថា ក្នុងឆ្នាំ២០២១ មន្ទីរបានទិញពូជ Po3 ពីប្រទេសវៀតណាម ចំនួន ៣ម៉ឺនគ្រាប់ សម្រាប់ចែកដល់ប្រជាកសិករ នៅក្រុងសែនមនោរម្យ ចំនួន២០គ្រួសារ ក្នុង១គ្រួសារ ទទួលបាន ១៥០០គ្រាប់ កាលពីអំឡុងខែតុលា ឆ្នាំ២០២១ រហូតមកដល់ពេលនេះ មន្ទីរបានរៀបចំប្រមូលផលដំណាំដំឡូងបារាំងរបស់កសិករ គ្រី ម៉េងឃាង ដែលដាំដុះលើផ្ទៃដី ៣០០ម៉ែត្រការ៉េ ស្ថិតនៅភូមិចម្ការតែ សង្កាត់ស្ពានមានជ័យ ក្រុងសែនមនោរម្យ ដែលតាមការស្ទង់ទិន្នផលគិតជាមធ្យមទទួល បានមើមដំឡូងបារាំងចំនួន ១៧,៥តោន/ហិកតា។ 

លោក បញ្ជាក់ថា ការពិសោធន៍ការដាំដំឡូងបារាំងនៅខេត្តមណ្ឌលគិរីនេះ ត្រូវបានចាប់ផ្តើមអនុវត្តតាំងពីឆ្នាំ២០១៦ ដល់២០១៨ ចំនួន ២ទីតាំង មានរយៈកម្ពស់ ៨៤០ម៉ែត្រ នៅឃុំដាក់ដាំ ស្រុកអូររាំង និងមានប្រភេទពូជមកពីបណ្តាប្រទេសផ្សេងៗ (វៀតណាម កូរ៉េខាងត្បូង អាល្លឺម៉ង់ កាណាដា ….)។ ការដឹកនាំពិសោធន៍ដោយសាកលវិទ្យាល័យភូមិន្ទកសិកម្ម និងអគ្គនាយកដ្ឋានកសិកម្ម ក្រោមការឧបត្ថម្ភពីគម្រោង KOPIA នៃសាធារណរដ្ឋកូរ៉េ៕

ប្រភព៖ ក្រសួងព័ត៌មាន