(អ៉ីស្លាម៉ាបាដ)៖ បើតាមការចេញផ្សាយដោយ ទីភ្នាក់ងារព័ត៌មានចិនស៊ីនហួរ នាព្រឹកថ្ងៃសុក្រ ទី០១ ខែឧសភា ឆ្នាំ២០២០ ប្រធានរដ្ឋសភាប៉ាគីស្ថានលោក អាស្សេដ ខៃសឺ (Asad Qaiser) ត្រូវបានអាជ្ញាធរ បញ្ជាក់ កាលពីយប់ថ្ងៃព្រហស្បតិ៍សប្តាហ៍នេះថា បានឆ្លងជំងឺ COVID-19 ហើយពេលនេះលោក បានសម្រេចចិត្ត ស្នាក់នៅដាច់ដោយឡែកក្នុងផ្ទះ ដើម្បីតាមដានអការៈរោគ និងព្យាបាល។

លោក Asad Qaiser បានបង្ហោះនៅក្នុងគណនី Twitter លោកយ៉ាងដូច្នេះថា «ការធ្វើតេស្តរកវីរុសកូរ៉ូណា របស់ខ្ញុំ ចេញលទ្ធផលវិជ្ជមាន។ ខ្ញុំបានសម្រេចចិត្ត ស្នាក់នៅដាច់ដោយឡែកក្នុងផ្ទះរបស់ខ្ញុំ»។ លោក Qaiser ក៏បានអំពាវនាវឲ្យប្រជាជាតិប៉ាគីស្ថានទាំងមូល ប្រុងប្រយ័ត្នខ្ពស់បំផុត ចំពោះជំងឺរាតត្បាតសកលនេះផងដែរ ប៉ុន្តែប្រធានសភារូបនេះ មិនបានបង្ហើប អំពីស្ថានភាពសុខភាពរបស់លោកនោះឡើយ។

មិនទាន់មានប្រភពបញ្ជាក់ អំពីរបៀបដែលប្រធានសភាប៉ាគីស្ថាន ឆ្លងជំងឺ COVID-19 នោះឡើយ ប៉ុន្តែនាប៉ុន្មានសប្តាហ៍ចុងក្រោយនេះ លោក Qaiser បានជួបប្រជុំជាមួយមន្ត្រី និងសមាជិកសភាជាច្រើនរូប ក្នុងនោះរួមមានទាំងលោកនាយករដ្ឋមន្ត្រី ប៉ាគីស្ថាន អ៉ីមរ៉ាន ខាន់ (Imran Khan) ផងដែរ។

គួរបញ្ជាក់ថា បើតាមតួលេខចុងក្រោយ ប្រទេសប៉ាគីស្ថានមានករណីឆ្លង COVID-19 សរុប ១៦,៨១៧ករណី ក្នុងនោះស្លាប់ ៣៨៥នាក់ និងជាសះស្បើយ ៤,១០៥នាក់៕