នារសៀលថ្ងៃព្រហស្បតិ៍ ទី០២ ខែមករា ឆ្នាំ២០២៣នេះ សម្តេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រៃវែង-បាត់ដំបង និងឯកឧត្តម កែ គឹមយ៉ាន ឧបនាយករដ្ឋមន្រ្តី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ បានអញ្ជើញជាអធិបតីដ៏ខ្ពង់ខ្ពស់ក្នុងពិធីសំណេះសំណាលជាមួយថ្នាក់ដឹកនាំយុវជន ខេត្តព្រៃវែង បាត់ដំបង និងខេត្តបន្ទាយមានជ័យ ដោយមានការអញ្ជើញចូលរួមពី ឯកឧត្តម កើត រិទ្ធ រដ្ឋមន្ដ្រីក្រសួងយត្តិធម៌, រដ្ឋលេខាធិការប្រចាំការក្រសួងមហាផ្ទៃ, អគ្គស្នងការដ្ឋាននគរបាលជាតិ, អនុប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រៃវែង បាត់ដំបង និងបន្ទាយមានជ័យ ព្រមទាំងអ្នកពាក់ព័ន្ធជាច្រើនរូបទៀត ដែលពិធីនេះរៀបចំឡើងនៅសណ្ឋាគារសុខាភ្នំពេញ។
នាឱកាសនោះ លោកបណ្ឌិត អាំង សិរីពិសិដ្ឋ ប្រធានប្រតិបត្តិគណៈកម្មការរៀបចំពិធី បានធ្វើសេចក្តីរាយការណ៍សង្ខេប ស្ដីពីសមិទ្ធផលការងារ បញ្ហាប្រឈម និងទិសដៅអនុវត្តបន្ដរបស់ក្រុមការងារអាហារូបករណ៍ ស សុខា, ក្រុមការងារអភិវឌ្ឍយុវជនទាំង ៣ខេត្ត និង សមាគមគ្រូពេទ្យស្ម័គ្រចិត្ត ស សុខា ជូនគណៈអធិបតី និងអង្គពិធីទាំងមូលថា ក្រោមការដឹកនាំរបស់រាជរដ្ឋាភិបាលកម្ពុជា កាលពីឆ្នាំ២០២២ ប្រទេសកម្ពុជា ត្រូវបានទទួលស្គាល់ពីអន្ដរជាតិ ជាប្រទេសមានសមត្ថភាពគ្រប់គ្រាន់ ក្នុងការបង្ការ និងទប់ស្កាត់ ការរីករាលដាលជំងឺកូវីដ-១៩ ប្រកបដោយប្រសិទ្ធិភាព ពិសេសវិធានការចាក់ស្រោចវ៉ាក់សាំងកូវីដ-១៩ នៅទូទាំងប្រទេស បានបង្កើតឡើងភាពស៊ាំក្នុងសហគមន៍ រហូតដល់មានលទ្ធភាពគ្រប់គ្រាន់ក្នុងការបើកប្រទេសឡើងវិញ ព្រមទាំងសកម្មភាព សេដ្ឋកិច្ចសង្គម ដែលជាក្ដីប្រាថ្នារបស់មនុស្សជាតិ។
លោកបណ្ឌិត បន្ដទៀតថា ស្ថិតក្នុងស្ថានភាពដល់អំណោយផលនេះ ក្រុមការងារអភិវឌ្ឍយុវជនទាំង ៣ខេត្ត, ក្រុមការងារអាហារូបករណ៍ ស សុខា និង សមាគមគ្រូពេទ្យស្ម័គ្រចិត្ត ស សុខា បានបន្ដរួមកម្លាំងសាមគ្គីគ្នា បំពេញបេសកកម្ម ដោយរួមចំណែកបម្រើប្រទេសជាតិ និងប្រជាជន កាន់តែសកម្មជាងមុនផងដែរ។
ឆ្លៀតឱកាសនោះដែរ សម្ដេចក្រឡាហោម ស ខេង មានប្រសាសន៍លើកឡើងថា ក្នុងនាមរាជរដ្ឋាភិបាលកម្ពុជា និងក្នុងនាមសម្ដេច ផ្ទាល់ សូមកោតសរសើរ និងវាយតម្លៃខ្ពស់ចំពោះថ្នាក់ដឹកនាំយុវជន ខេត្តព្រៃវែង បាត់ដំបង និងខេត្តបន្ទាយមានជ័យ ដែលបានខិតខំប្រឹងប្រែងរួមចំណែកបម្រើប្រទេសជាតិ និងប្រជាជន ដោយសម្រេចបានសមិទ្ធផលនានា ជាពិសេស បានចូលរួមទប់ស្កាត់ជំងឺកូវីដ-១៩ និងគ្រោះមហន្ដរាយផ្សេងៗ ជាដើម។
សម្ដេចក្រឡាហោម បន្ដថា ក្រោមការដឹកនាំរបស់រាជរដ្ឋាភិបាលកម្ពុជា បានសម្រេចនូវសមិទ្ធផលថ្មីៗជាច្រើន លើមាគ៌ានៃការអភិវឌ្ឍ បើទោះបីជាជំងឺកូវីដ-១៩ មិនទាន់ត្រូវបានលុបបំបាត់ទាំងស្រុងក្តី និងត្រូវទទួលរងឥទ្ធិពលពីការវិវត្តដ៏ស្មុគស្មាញនៃសភាពការណ៍អន្តរជាតិក្ដី។ សម្ដេចក្រឡាហោម បន្ថែមថា សន្តិភាព ស្ថិរភាព នយោបាយ និងសន្តិសុខដែលជាមូលដ្ឋានគ្រឹះសម្រាប់ការអភិវឌ្ឍ និងការរស់នៅដ៏សុខដុមរមនារបស់ប្រជាជន ត្រូវបានការពារយ៉ាងគត់មត់ដោយកម្លាំងជាតិទាំងមូល ដែលបានរួមសាមគ្គីគ្នាយ៉ាងរឹងមាំ។
សម្ដេចក្រឡាហោម បានចាត់ទុកភាពរីកចម្រើនរបស់កម្ពុជាថា មិនអាចខ្វះបាននូវការកសាងធនធានមនុស្ស និងការអភិវឌ្ឍធនធានមនុស្សដែលប្រកបទៅដោយបញ្ញាញាណ ចាប់តាំងពីកម្រិតបឋមសិក្សា រហូតដល់អនុវិទ្យាល័យ វិទ្យាល័យ ថ្នាក់ឧត្តមសិក្សា និងក្រោយឧត្តមសិក្សាបានឡើយ។
លើសពីនេះ សម្ដេចក្រឡាហោម ស ខេង ក៏បានជំរុញដល់ក្រុមការងារយុវជន ឱ្យបង្កើនសកម្មភាពចុះមូលដ្ឋានរៀងៗខ្លួន និងត្រូវដោះស្រាយរាល់បញ្ហាប្រឈមនានា ដែលមិនទាន់មានដំណោះស្រាយ និងជំរុញការអភិវឌ្ឍ មូលដ្ឋានឱ្យបានផុសផល ដើម្បីជីវភាពរបស់ប្រជាពលរដ្ឋកាន់តែមានភាពល្អប្រសើរ។
ជាងនេះទៅទៀត សម្ដេចក្រឡាហោម ស ខេង ក៏បានណែនាំក្រុមការយុវជន និងអ្នកពាក់ព័ន្ធទាំងអស់ ត្រូវបង្កើននូវការផ្តល់សេវាសាធារណៈជូនប្រជាពលរដ្ឋ ប្រកបដោយតម្លាភាព គណនេយ្យភាព និងមានប្រសិទ្ធភាពខ្ពស់ ដោយអនុវត្តឱ្យបានតាមទិសស្លោក «ធ្វើឱ្យបាន ធ្វើឱ្យលឿន និងមានតម្លាភាព» ដើម្បីឆ្លើយតបទៅនឹងវឌ្ឍនភាពសង្គម ក្រុមការងារយុវជន ត្រូវបង្កើនការកសាងសមត្ថភាព ចំណេះដឹងពាក់ព័ន្ធការងារសង្គម និងនយោបាយ ហើយត្រូវមានសីលធម៌ និងអាកប្បកិរិយាល្អចំពោះប្រជាពលរដ្ឋនៅពេលចុះមូលដ្ឋានផងដែរ។
សម្ដេចក្រឡាហោម បានផ្ដាំផ្ញើដល់ថ្នាក់ដឹកនាំយុវជនទាំងអស់ បន្តស្មារតីរួបរួមគ្នា ដើម្បីថែរក្សាសុខសន្តិភាព និងបន្តការខិតខំប្រឹងប្រែងបន្ថែមទៀត ក្នុងការអភិវឌ្ឍកម្ពុជា និងការកសាងសន្តិសុខ ប្រកបដោយភាពសុខដុម ដោយផ្អែកលើការគោរពគ្នា ការយោគយល់គ្នា ការជឿទុកចិត្តគ្នា និងការគោរពប្រយោជន៍គ្នាទៅវិញទៅមក និងចូលរួមថែរក្សាសមិទ្ធផលទាំងឡាយ ដែលកម្ពុជាសម្រេចបាន ក្នុងរយៈពេលជាង ៤០ឆ្នាំ កន្លងមកនេះ។
សម្ដេចក្រឡាហោម ស ខេង ក៏បានណែនាំបន្ថែមដល់ ក្រុមការងារយុវជនត្រូវបន្តចូលរួមថែរក្សាសន្តិភាព ស្ថិរភាពនយោបាយ សន្តិសុខ សណ្តាប់ធ្នាប់សង្គម តាមរយៈ ភូមិ ឃុំ សង្កាត់ មានសុវត្ថិភាព ការចូលរួមសហការ និងជំរុញឱ្យអាជ្ញាធរ និងសា្ថប័នមានសមត្ថកិច្ចចាត់វិធានការ ទប់ស្កាត់រាល់បទល្មើសគ្រឿងញៀន ល្បែងស៊ីសងគ្រប់ប្រភេទ ក្មេងទំនើង និងចោរប្លន់ប្រដាប់អាវុធ គ្រោះថ្នាក់ចរាចរណ៍ជាដើម ដែលកើតឡើងនៅក្នុងមូលដ្ឋានរបស់ខ្លួន៕
ដោយ ៖ នាយកដ្ឋានព័ត៌មានវិទ្យា
