(ហ្សឺណែវ)៖ បើតាមការចេញផ្សាយ ដោយសារព័ត៌មាន CNA នៅព្រឹកថ្ងៃចន្ទ ទី១៣ ខែកក្កដា ឆ្នាំ២០២០ អង្គការសុខភាពពិភពលោក (WHO) បានរាយការណ៍ពីការកើនឡើងនៃករណីឆ្លង COVID-19 ទូទាំង ពិភពលោក ២៣០,៣៧០នាក់ក្នុងរយៈពេល ២៤ម៉ោងចុងក្រោយនេះ ដែលជាតួលេខខ្ពស់បំផុត មិនធ្លាប់មាននោះឡើយ គិតចាប់តាំងពីជំងឺនេះផ្ទុះឡើង។

បើតាម WHO ពេញមួយថ្ងៃអាទិត្យម្សិលមិញ ករណីឆ្លង COVID-19 យ៉ាងគំហុកត្រូវបានរាយការណ៍នៅ ក្នុងប្រទេសប្រេស៊ីល សហរដ្ឋអាមេរិក ឥណ្ឌា និងអាហ្វ្រិកខាងត្បូង ខណៈអ្នកស្លាប់មាន ៥,០០០នាក់ ក្នុងមួយថ្ងៃដូចគ្នា។ អង្គការ WHO កាលពីថ្ងៃទី១០ ខែកក្កដាកន្លងទៅ ក៏ធ្លាប់បានប្រកាសផង ដែរពីការរក ឃើញ ករណីឆ្លង COVID-19 ប្រចាំថ្ងៃចំនួន ២២៨,១០២នាក់។

ពេញមួយថ្ងៃអាទិត្យម្សិលមិញ សហរដ្ឋអាមេរិកមានអ្នកឆ្លង COVID-19 ៥៩,៧៤៧នាក់ ធ្វើឱ្យករណី ឆ្លងសរុបកើនដល់ ៣.៤លានករណី ក្នុងនោះស្លាប់ ១៣៧,៧៨២នាក់ និងជាសះស្បើយឡើងវិញ ១.៥លាន នាក់។ ចំណែកឯប្រេស៊ីលវិញ មានករណីឆ្លងសរុបកើនដល់ ១.៨លានករណី ក្នុងនោះ ៧២,១០០នាក់បានស្លាប់ និងជាសះស្បើយឡើងវិញ ១.២លាននាក់។

គួរបញ្ជាក់ថា បើតាមគេហទំព័រ worldometers ចំនួនករណីឆ្លង COVID-19 នៅទូទាំងពិភពលោកបាន កើនដល់ច្រើនជាង ១៣លានករណីហើយ ក្នុងនោះស្លាប់ ៥៧១,៥១៨នាក់ និងជាសះស្បើយឡើងវិញ ៧.៥លាននាក់៕