ក្រុមការងារព័ត៌មាននិងប្រតិកម្មរហ័ស នៃស្នងការដ្ឋាននគរបាលខេត្តកណ្តាល មានកិត្តិយសសូមធ្វើការឆ្លើយតបជូនប្រជាពលរដ្ឋដែលបានទូរស័ព្ទឱ្យសមត្ថកិច្ចជួយអន្តរាគមន៍ ថាមានសមាជិកគ្រួសារគាត់ដែលត្រូវជាកូន និងបងប្រុស ឈ្មោះ ស្រេង វី ភេទប្រុស អាយុ ២៣ឆ្នាំ បានលួចប្រើប្រាស់គ្រឿងញៀននៅលើផ្ទះ ។
នៅថ្ងៃចន្ទ ៣រោច ខែអស្សុជ ឆ្នាំជូតទោស័ក ពុទ្ធសករាជ ២៥៦៤ត្រូវនឹងថ្ងៃ ទី០៥ ខែតុលា ឆ្នាំ ២០២០ វេលាម៉ោង១៨:៤៦នាទី ។
ក្រោយពីទទួលបានព័ត៌មានភ្លាម ដោយមានការចង្អុលបង្ហាញពីក្រុមការងារប្រតិកម្មរហ័ស GCNP អគ្គស្នងការដ្ឋាននគរបាលជាតិ ក្រុមការងារប្រតិកម្មរហ័ស នៃស្នងការដ្ឋាននគរបាលខេត្តកណ្តាល បានបញ្ជូនដំណឹងនេះដល់អធិការនគរបាលស្រុកមុខកំពូល ហើយបានចាត់កម្លាំងជំនាញផ្នែកប្រឆាំងគ្រឿងញៀន និងកម្លាំងប៉ុស្តិ៍រកាកោង២ ចុះទៅដល់ផ្ទះឈ្មោះ ឈុន សុគន្ធ(ត្រូវជាម្តាយ) ភេទស្រី អាយុ ៦១ឆ្នាំ ,ឈ្មោះ ស្រេង ស្រីណែត (ត្រូវជាប្អូន) ភេទស្រី អាយុ១៧ឆ្នាំ អ្នកទាំងពីរមានទីលំនៅ ភូមិដើមជ្រៃ ឃុំរកាកោងទី២ ស្រុកមុខកំពូល ខេត្តកណ្ដាល ។
ជាសំណូមពររបស់អាណាព្យាបាលនិងប្អូនស្រី សុំឱ្យសមត្ថកិច្ចជួយអប់រំណែនាំ និងធ្វើកិច្ចសន្យាបញ្ឈប់ការប្រើប្រាស់គ្រឿងញៀនទៀត ហើយជួយបញ្ជូនកូនប្រុសរបស់គាត់ទៅបន្សាបគ្រឿងញៀន នៅមណ្ឌលអប់រំកែប្រែផង ព្រោះគាត់ពុំមានលទ្ធភាពចេញថវិកា សម្រាប់បង់មណ្ឌលក្រែប្រែនិងសោហ៊ុយទេ ។
ឆ្លើយតបនឹងសំណូមពរខាងលើរបស់អ្នកមីង សមត្ថកិច្ចប៉ុស្តិ៍ក៏បាននាំខ្លួនឈ្មោះ ស្រេង វី មកប៉ុស្តិ៍នគរបាលរដ្ឋបាលរកាកោងទី ២ ដើម្បីអប់រំណែនាំ និងធ្វើកិច្ចសន្យាឱ្យបញ្ឈប់ការប្រើប្រាស់គ្រឿងញៀន ។
ដោយពិនិត្យឃើញជាក់ស្ដែងនៅជីវភាពខ្វះខាតរបស់អ្នកមីង លោក អធិការផ្នែកជំនាញនិងលោកនាយប៉ុស្តិ៍ ក៏ជួយទាំងមធ្យោបាយ និងថវិកាមួយចំនួនសម្រាប់បង់សេវាមណ្ឌលកែប្រែនិងសោហុយ ដើម្បីសម្រួលក្នុងការបញ្ជូនកូនប្រុសគាត់ទៅមណ្ឌលកែប្រែ និងបន្សាបគ្រឿងញៀន ។
