WASHINGTON (Reuters) ៖ កាលពីថ្ងៃ ពុធ ទីប្រឹក្សាសន្តិសុខជាតិអាមេរិក បានព្រមានប្រទេសចិន ដោយប្រឆាំងនឹងរាល់ការប៉ុនប៉ងដណ្ដើមការកាន់កាប់កោះតៃវ៉ាន់ដោយប្រើប្រាស់កងកម្លាំងណាមួយ ដោយនិយាយថា សកម្មភាពយោធាពីលើផ្ទៃសមុទ្រ នឹងមានការលំបាកដ៏ខ្លាំងក្លា និងមានភាពមិនច្បាស់លាស់ថា តើសហរដ្ឋអាមេរិកនឹងតបតវិញយ៉ាងដូចម្ដេច ។
លោក Robert O’Brien បានប្រាប់ទៅកាន់ព្រឹត្តិការណ៍មួយនៅសាកលវិទ្យាល័យ Nevada នៅរដ្ឋ Las Vegas ថា ប្រទេសចិនជាប់ពាក់ព័ន្ធនឹង ការបង្កើនកងទ័ពជើងទឹកដ៏ធំមួយដែលទំនងជាមិនធ្លាប់បានឃើញ តាំងពីការប៉ុនប៉ងរបស់អាល្លឺម៉ង់ ដើម្បីប្រកួតប្រជែងជាមួយកងកម្លាំងជើងទឹកអង់គ្លេស មុនសង្គ្រាមលោកលើកទី១ ។
លោក បាននិយាយទៀតថា មួយផ្នែកនៃការបង្កើនកងទ័ពជើងទឹកនេះ នេះផ្ដល់ឱ្យពួកគេនូវលទ្ធភាពរុញច្រានពួកយើង ចេញពីតំបន់ប៉ាស៊ីហ្វិកភាគខាងលិច និងអនុញ្ញាតឱ្យពួកគេធ្វើសកម្មភាពយោធាប្រឆាំងកោះតៃវ៉ាន់ ។ លោក O’Brien បានបន្ថែមទៀតថា បញ្ហាគឺថាការវាយប្រហារតាម សមុទ្រគឺមានលំបាកយ៉ាងខ្លាំងដោយសារតែ ប្រទេសចិនមានចម្ងាយ១៦០គីឡូម៉ែត្រពីកោះតៃវ៉ាន់ និងឆ្នេរសមុទ្រមិនអំណោយផល សម្រាប់ប្រតិបត្តិការវាយប្រហារពីសមុទ្រ ។
នៅពេលត្រូវបានសួរថា តើអាមេរិកនឹងយកជម្រើសមួយណា ប្រសិនបើសកម្មភាពរបស់ចិនប៉ុនប៉ងគ្រប់គ្រងកោះតៃវ៉ាន់ លោកបាននិយាយថា នោះមិនមែនជាកិច្ចការងាយស្រួលឡើយ ហើយក៏មានភាពមិនច្បាស់លាស់ជាច្រើនផងដែរ ថាតើសហរដ្ឋអាមេរិកនឹងធ្វើអ្វីដើម្បីតបតទៅនឹង ការវាយប្រហារដោយប្រទេសចិនលើកោះតៃវ៉ាន់ ៕
