ពោធិ៍សាត់ ៖ ដោយសារភ្លៀងបន្តធ្លាក់ជាច្រើនថ្ងៃនៅតាមតំបន់ខ្ពង់រាប និងតំបន់ភ្នំនៃស្រុកវាលវែង ខេត្តពោធិ៍សាត់ បានបង្កអោយកម្ពស់ទឹកឡើងខ្ពស់ បង្កជាទឹកជំនន់ (ជំនន់ទឹកភ្លៀង) បានហូរគួចផ្ទះ០១ខ្នងរបស់ប្រជាពលរដ្ឋ ស្ថិតនៅក្នុងភូមិស្ទឹងថ្មី ឃុំប្រម៉ោយ ស្រុកវាលវែង បណ្តាលអោយខូចខាតទាំងស្រុង នាវេលាម៉ោង២១ និង ៣០នាទី ថ្ងៃទី០៨ ខែតុលា ឆ្នាំ២០២០ ។
លោក វរសេនីយ៍ឯក ធាង ឡេង អធិការនគរបាលស្រុកវាលវែង បានប្រាប់អោយដឹងថា ជំនន់ទឹកភ្លៀងកាលពីប៉ុន្មានថ្ងៃនេះបានឡើងខ្ពស់ ហើយបានហូរគួចផ្ទះប្រជាពលរដ្ឋដែលមានម្ចាស់ ឈ្មោះ វ៉ា ចន អាយុ៤៨ឆ្នាំ ប្រពន្ធឈ្មោះ សួន សារឿន អាយុ ៤២ឆ្នាំ ជាប្រភេទផ្ទះទាមទំហំ ៤.៥x៦ម៉ែត្រ ជញ្ជាំងក្តារប្រក់សង្ក័សី បណ្តាលខូចខាតអស់ទាំងស្រុង រួមទាំងសម្ភារ:មួយចំនួន ហើយសម្ភារ:មួយចំនួនទៀតត្រូវបានជញ្ជូនយកចេញ ។
លោក អធិការក៏បានអំពាវនាវដល់ប្រជាពលរដ្ឋ ដែលសង់លំនៅដ្ឋាននៅតាមមាត់ច្រាងស្ទឹង ព្រែក ឬអូរ ត្រូវមានការប្រុងប្រយ័ត្នខ្ពស់ រាល់ពេលមានភ្លៀងទឹកធ្លាក់ជាច្រើនថ្ងៃ ដើម្បីជៀសវាងរាល់ការខូចខាត បាត់បង់ដែលបង្កឡើងមកពីទឹកជំនន់ ៕
